دەسەڵاتدارانی ڕووسیا ڕۆژی پێنجشەممە هۆشدارییان دژ بە خۆپیشاندانیان دایە هاوسۆزانی دژە جەنگ لە وڵاتەکە. ئەمەش پاش ئەوەی سەرۆکی ڕووسیا ڤلادمێر پوتن هێرشی بۆ سەر ئۆکرانیا دەستپێکرد.
کۆمیتەی لێکۆڵینەوە، کە دامەزراوەیەکی حکومەتەو لێکۆڵینەوە لە تاوانە قورسەکان دەکات، هۆشداری هەلومەرجی یاسایی دابە ڕووسیاییەکان بۆ بەشداریکردن لە هەر خۆپیشاندانێکی ڕێگەپێنەدراوی پەیوەست بە " ئاڵۆزییەکانی دۆخی سیاسی دەرەکی."
دەڵێت وەڵامی ئەو داواکارییانە دراوەتەوە کە لە تۆڕە کۆمەڵایەتییەکاندا بڵاوکراونەتەوە و داوای خۆپیشاندانی دژ بە بڕیارەکەی پوتن بۆ هێرشکردنە سەر ئۆکرانیا کراوە.
کۆمیتەکە دەڵێت " پێویستە مرۆڤ ئاگاداری دەرئەنجامە یاساییە نەرێنییەکانی ئەو کارانە بێت کە دەچنە خانەی دادگاییکردن لە سەر بەرپرسیارێتیی تاوانکاری."
وەزارەتی ناوخۆی ڕووسیاش دەڵێت " هەمو هەنگاوێکی پێویست دەگیرێتەبەر بۆ دڵنیابوون لە فەرمانی گشتی."
ڕووسیا یاسای توندی خۆپیشاندانی هەیە و زۆرجاریش خۆپیشاندانەکان بە دەستگیرکردنی بەکۆمەڵ کۆتاییپێدێت.
ژمارەیەک لە ڕووسیاییەکان لە تۆڕە کۆمەڵایەتییەکاندا داوایان لە خەڵکی کردووە بچنە سەر شەقامەکان بۆ ناڕەزایی دەربڕین بەرامبەر بە هێرشەکان بۆ سەر ئۆکرانیا.
ڕێکخراوێکی سەربەخۆی چاودێری مافەکانی مرۆڤ OVD-Info دەڵێت بەلایەنی کەم 27 کەس لە سەرانسەری ڕووسیا دەستگیرکراون بەهۆی خۆپیشاندانی دژ بە شەڕ.
لە ماوەی ڕابردوودا سەرۆکی ڕووسیا ڤلادیمێر پوتن مۆڵەتی ئەنجامدانی " ئەرکێکی سەربازی تایبەت " لە ڕۆژهەڵاتی ئۆکرانیادا، هێزەکانی ڕووسیا موشەکیان ئاڕاستەی شارەکانی ئۆکرانیا کرد، ئەمەش کاردانەوەی وڵاتانی جیهانی لێکەوتەوە.
سەرۆکی ڕووسیا ڤلادیمێر پوتن وتی " بڕیارمدا ئەرکێکی سەربازیی تایبەت ئەنجام بدەم، ئەوەش لەپێناو پاراستنی ئەو خەڵکانەی کە لە ماوەی هەشت ساڵی ڕابردوودا بێزار دەکرێن و بوونەتە ئامانجی کۆمەڵکوژی."
وتیشی " لەپێناو ئەمەدا هەوڵ دەدەین بۆ داماڵینی بوونی هێزە سەربازییەکان و نەهێشتنی بیانیەکان لە ئۆکرانیا. هەروەها بۆ لێپێچینەوە لەو کەسانەی کە تاوانێکی زۆریان دژی هاوڵاتیانی مەدەنی و هاوڵاتیانی ڕووسی ئەنجامداوە."
وەزیری دەرەوەی ئۆکرانیا دمیترۆ کۆلیبا وتی " پوتن دەستیکرد بە ئەنجامدانی هێرشە بەرفراوانەکەی بۆ سەر ئۆکرانیا، شارە هێمنەکانی ئۆکرانیا لە ئێستادا لەژێر هێرشی ئاسمانیدان."
سەرۆکی ئەمەریکا جۆو بایدن لە ڕاگەیاندنێکدا وتی "تەواوی جیهان نوێژ و نزا بۆ خەڵکی ئۆکرانیا دەکات کە ڕووبەڕووی هێرشێکی بێ پاساو بوونەتەوە لەلایەن هێزی لەشکری ڕووسیاوە. سەرۆک پوتن بە مەبەست شەڕی هەڵبژارد، ئەمەش شیانی هەیە زیانێگی گیانی زۆری لێبکەوێتەوە و خەڵکی بکەونە مەینەتیـیەوە. تەنیا ڕووسیا لەو کوشتن و ماڵوێرانیـیە بەرپـرسیارە کە لەم هێرشە دەکەوێتەوە. ئەمەریکا و هاوپەیمانانی و هاوبەشەکانی بە یەک دەنگی و بە توندی وەڵامی دەدەنەوە. جیهان ڕووسیا بەرپـرسیاردەکات."
