بەرپرسانی باڵای یەکێتی ئەوروپا وتیان ڕابەرانی وڵاتانی یەکێتی ئەوروپا سزای نوێ دەسەپێنن بەسەر ڕووسیادا، سەرمایەکانی ڕووسیا لە ئەوروپا سڕ دەکەن و ڕێگە نادەن دەستیان بگات بە بانک و بازاڕی ئابووری ئەوروپا و " بەرژەوەندییەکانی کرێملنیش " دەکەنە ئامانج، ئەوەش وەکو وەڵامێک بۆ " هێرشە دڕندانەییەکەی ڕووسیا " بۆ سەر ئۆکرانیا.
بەرپرسان و ڕاگەیاندنەکان ئاماژەیان بەوەدا هێزەکانی ڕووسیا موشەکیان ئاڕاستەی کۆمەڵێک شاری ئۆکرانیا کردووە و سەربازەکانیان لە کەناراوەکانیدا جێگیرکردووە. ئەمەش دوای ئەوەی سەرۆکی ڕووسیا ڤلادیمێر پوتن مۆڵەتیدا بە ئەنجامدانی " ئەرکێکی سەربازیی تایبەت لە ڕۆژهەڵاتی وڵاتەکە."
سەرۆکی کۆمسیۆنی ئەوروپا ئۆرسولا ڤۆن دێر لین وتی " سەرۆک پوتن بەرپرسە لە گەڕاندنەوەی جەنگ بۆ ئەوروپا." ئاماژەشی بەوەدا یەکێتی ئەوروپا بە بەرپرسیاری دەزانێت.
لە بەیاننامەیەکی بەپەلەدا ئۆرسولا ڤۆن دێر لین وتی " لەڕێی ئەم کۆمەڵە سزایەوە و کەرتە ستراتیژییەکانی ئابووری ڕووسیا دەکەینە ئامانج، ڕێگەیان لێدەگرین دەستیان نەگات بە تەکنەلۆجیا و بازاڕە هەستیارەکانەوە. ئابووری ڕووسیا لاواز دەکەین، هەروەها تواناکانی بۆ نوێکردنەوە لاواز دەکەین."
وتیشی " لەگەڵ ئەوەشدا سەرمایەکانی ڕووسیا لە یەکێتی ئەوروپا سڕ دەکەین و چیتر ڕێگە نادەین بانکەکانی ڕووسیا دەستیان بگات بە بازاڕی ئابووری یەکێتی ئەوروپا."
سەرچاوە/ ڕۆیتەرز