رەجەب تەیب ئەردۆغان، سەرۆک کۆماری تورکیا، سەبارەت بە خولی دووهەمی هەڵبژاردنی سەرۆکایەتی کە بڕیارە 28ی 5 بەڕێوەبچێت، ڕایگەیاند، "ئێستا کاتی ئەوەیە تاجی سەرکەوتنێکی گەورەتر لەسەر ئەو سەرکەوتنە بنێین کە لە 14ی پێنجدا بەدەستمان هێنا."
ئەردۆغان لە وتارەکەیدا کە لە هەژماری تایبەتی خۆی لە تۆڕی کۆمەڵایەتی تویتەر بڵاویکردووەتەوە، سوپاسی ئەو کەسانە دەکات کە پشتیوانییان کردووە و دەڵێت، "وەک هاوپەیمانی کۆماری، یەکەم تاقیکردنەوەی گرینگترین هەڵبژاردنەکانی وڵاتەکەمان بە باشترین شێوە تێپەڕاند".
ئەردۆغان ئاماژەی بەوەش کرد خولی دووهەمی هەڵبژاردنەکان لە 28 ی پێنج بەڕێوەدەچێت، واتە ڕۆژێک دوای 63هەمین ساڵیادی کودەتاکەی 27ی ئایار.
ئەو گوتی " ئێمە ئەو هاوپەیمانییەین کە خواستی نەتەوەیی و خۆشەویستی بۆ خزمەتکردنی گەل خستووەتە ناوەندی سیاسەتەکەیەوە. ئێمە تەنها دەتوانین قەرزەکانمان بە سوپاسگوزاری خۆمان بۆ گەلەکەمان بدەینەوە، کە ئاگاداری ئێمە بووە و بۆ ئەم مەبەستە ڕووبەڕووی تاکەکان بووەتەوە کاتی پێویستدا، بە کاری زیاتر و خەباتی زیاتر. تورکیا چاوەڕوانی خزمەت لە ئێمە دەکات، چاوەڕوانی کردار دەکات، گەلەکەمان چاوەڕێی ئەوە دەکات کە ئامانجەکانی خۆیان بەدیبهێنین."
سەرۆکی تورکیا باس لە قوربانیانی بوومەلەرزە بەهێزەکەی مانگی دووش دەکات کە بووە هۆی گیانلەدەستانی نزیکەی 50 هەزار کەس و ئاوارەبوونی ملیۆنان کەسی تر.
ئەردۆغان دەڵێت "خوشک و برایانی قوربانیانی بوومەلەرزەمان چاوەڕێی ئەوەمان لێدەکەن بە زووترین کات برینەکانیان ساڕێژ بکەین. ئێمە لە ئێستاوە دەستمان بە کارکردن کردووە بۆ هەڵبژاردنی 28ی پێنج، دوای ئەوەی ڕەنگی سندوقی دەنگدان ڕوون بووەوە. بەهیوای ئەوەی ڕۆژانی داهاتوو بە باشترین و بەرهەمدارترین شێوە هەڵسەنگاندن بۆ ڕەوشەکە بکەن. بە ئیزنی خوای گەورە ڕۆژی 28ی پێنج دەکەینە موژدەی سەدەی تورکیا. باوەڕم پێتانە."
بەهۆی ئەوەی هیچ کام لە کاندیدەکانی سەرۆکایەتی نەیانتوانی بگەن بە % 51ی دەنگەکان ڕۆژی 28 ی مانگ سەرۆکی تورکیا ڕەجەب تەیب ئەردۆغان و سەرۆکی جەهەپە کەمال و کاندیدی هاوپەیمانی نیشتمانی گەل کەمال کلیچدارئۆغڵو لە گەڕی دووهەمی هەڵبژاردنەکاندا ڕووبەڕووی یەک دەبنەوە.
