یەکێک لە پێشکەشکارە هەرە بەناوبانگەکانی ئەفغانستان لەلایەن تاڵیبانەوە دەستگیر کراوە بەهۆی ئەوەی ڕایگەیاندووە پەخشکردنی دراما بیانییەکان لە تەلەفیزیۆنە خۆجێهییەکانەوە قەدەغەکراوە.
گروپەکانی مافەکانی مرۆڤ دابەزینی ئاستی ئازادی میدیا و زیادبوونی هێرشەکان بۆسەر ڕۆژنامەوانان لەو کاتەوەی تاڵیبان گەڕاوەتەوە ئەفغانستان، شەرمەزار دەکەن و نەتەوە یەکگرتووەکانیش داوای کۆتاییهاتن بە " ترساندن و هەڕەشەکردن لە ڕۆژنامەوانان" دەکات.
تۆلۆنیوز تۆڕی تەلەفیزیۆنی سەربەخۆ، ڕۆژی هەینی ڕایگەیاند پێشکەشکار بەهرام ئەمان ئێوارەی پێنجشەممە لە ئۆفیسی کەناڵەکە لەگەڵ خپولواک ساپایی بەڕێوەبەری هەواڵ و ڕاوێژکاری یاسایی نافی خاڵق دەستگیرکراون.
تۆلۆنیوز لە بڵاوکراوەکەیدا دەڵێت " ئەو سێ کەسە بەهۆی ڕاگەیاندنی ئەوەی کە دەسەڵاتداران زنجیرە دراما بیانییەکانیان قەدەغە کردووە، دەستگیرکران."
سپایی و خاڵق پاشان لە شەوی پێنجشەممە لەسەر هەینی ئازاد کران.
خزمێکی نزیکی ئەمان بە مەرجێک ناوی ئاشکرا نەکرێت بە ئاژانسی دەنگوباسی فرانس پرێسی گوت " تەواوی بنەماڵەکەمان نیگەرانن". هەروەها گوتوشیەتی " پێشتر هەڕەشەیان لێکردبوو ."
ڕاپۆرتەکان لەسەر دەستگیرکردنی ئەو سێ کەسە کاردانەوەی توندی لەلایەن ئەرکەی نەتەوە یەکگرتووەکان لە ئەفغانستان لێکەوتەوە. ڕێکخراوەکە لە تویتێکدا دەڵێت " نەتەوە یەکگرتووەکان داوا دەکات هەموو ئەو کەسانە ئازادبکرێن کەلەلایەن چەکدارەکانەوە براون و کۆتایی بە ترساندن و هەڕەشەی دژ بە ڕۆژنامەوانان و میدیای سەربەخۆ بهێنن."