دەزگاکانی ڕاگەیاندنی سعودیە ئاماژەیان بەوەدا وڵاتەکە ڕێگەیداوە ڤاکسینەکەی هەردوو کۆمپانیای فایزەر و بایۆنتیک دژی ڤایرۆسی کۆرۆنا بەکاربهێندرێت، بەمەش سعودیە دەبێتە دووەمین وڵات دوای بەحرەین گڵۆپی سەوز بۆ بەکارهێنانی ڤاکسینەکە هەڵبکات.
دەزگای هەواڵی سعودیە لە بەیاننامەیەکدا وتی " لیژنەی گشتی خۆراک و دەرمان ڕایگەیاند ڕازیبووە لەسەر بەکارهێنانی ڤاکسینەکەی فایزەر و بایۆنتیک دژی ڤایرۆسی کۆرۆنا."
وتیشی " ئەمەش دەبێتە هۆی ئەوەی لایەنە تەندروستیەکانی سعودیە بتوانن ڤاکسینەکە هاوردە بکەن و بەکاریبهێنن."
هەفتەی ڕابردوو بەحرەین بەکارهێنانی ڤاکسینەکەی پەسەند کرد، هەروەها هەریەک لە بەڕیتانیا و کەنەداش پەسەندیان کردووە.
سەرچاوە/ فرانس پرێس