سکرتێری گشتی هاوپەیمانێتی ناتۆ یانس ستۆڵتنبێرگ دەڵێت گرتنی شارێکی نێو ئەو ناوچانەی ئۆکرانیا کە ڕووسیا دەڵێت لکاندوونی بە ڕووسیاوە لەلایەن ئۆکرانیاوە دەریدەخات کە ئۆکرانییەکان بەرەوپێشەوە چوون و دەتوانن هێزەکانی ڕووسیا دووربخەنەوە.
ستۆڵتنبێرگ لە چاوپێکەوتنێکدا لەگەڵ پڕۆگرامی Meet the press ی کەناڵی ئێن بی سیدا گوتی " بینیمان کە ئەوان لە توانایاندا هەیە شارێکی نوێ بگرن، لیمان، ئەوەش دەریدەخات کە ئۆکرانییەکان بەرەوپێشەوە چوون و بەهۆی بوێری و ئازایەتی و تواناکانیان و هەروەها بەهۆی ئەو چەکە پێشکەوتووانەشەوە کە ئەمەریکا و هاوپەیمانەکانی دیکە پێیان داوە، دەتوانن هێزەکانی ڕووسیا دووربخەنەوە."
ستۆڵتنبێرگ گوتی باشترین ڕێگە بۆ ڕووبەڕووبوونەوەی ڕاگەیاندنەکەی ڕووسیا بۆ لکاندنی چەند هەرێمەکەی ئۆکرانیا بە ڕووسیاوە ، بەردەوامیدانە بە پشتیوانییەکان لە حکومەتی کیێڤ.
کاتێک پرسیاری لێکرا سەبارەت بە داواکەی ئۆکرانیا بۆ بوون بە ئەندام لە هاوپەیمانێتی ناتۆدا، ستۆڵتنبێرگ وتی " هەر بڕیارێک لەسەر ئەندامێتی دەبێت لەلایەن 30 وڵاتەکەی هاوپەیمانێتییەکەوە پەسەند بکرێت و ئینجا ئەو جۆرە بڕیارە بدرێت."
سەبارەت بە دزەکردنی گازیش لە بۆری` نۆرد ستریمی گواستنەوەی گازی ڕووسیا بۆ ئەوروپا، گوتی پشتیوانی لە لێکۆڵینەوەکان دەکات سەبارەت بەو کارە تێکدەرانەیەی کە بووەتە هۆی دزەکردنی گاز لە بۆرییەکەدا.
گوتیشی " هەر هێرشێکی بە مەبەست بۆ سەر ژێرخانە هەستیارەکانی ناتۆ ڕووبەڕووی وەڵامێکی توند و یەکگرتوو دەبێتەوە."
سەرچاوە/ ڕۆیتەرز
ستۆڵتنبێرگ: پێشڕەوی ئۆکرانیا لە لیمان دەریدەخات کە ئۆکرانیا دەتوانێت هێزەکانی ڕووسیا دووربخاتەوە
