سەرۆکی ئێران حەسەن ڕۆحانی وتی ئەگەر وڵاتەکە ڕووبەڕووی شەپۆلی دووەمی ڤایرۆسی کۆرۆنا ببێتەوە ئەوا کۆتوبەندە تایبەتیەکانی بەرەنگاربوونەوەی ڤایرۆسی کۆرۆنا دووبارە دەسەپێندرێنەوە.
ڕۆحانی وتی " ئەگەر ڕێکارەکان بەجددی وەرنەگیرێن و دووبارە بڵاوبوونەوەی نەخۆشیەکە زیادببێتەوە ئەوا کاربەدەستان ناچار دەبن دووبارە کۆتوبەندەکان بسەپێننەوە."
وتیشی " ئەمە کێشە بۆ ژیانی هاوڵاتیانی ئاسایی دروست دەکات و زیانێکی گەورە دەگەیەنێت بە ئابووری کۆمەڵگە."
ڕۆژی یەکشەممە لە چوارچێوەی کەمکردنەوەی ڕێوشوێنەکانی داخستنی گشتی وڵاتەکەدا، کارمەندان گەڕانەوە سەر کارەکانیان و دەرگای مزگەوتەکان دووبارە کرانەوە.
لە ناوەڕاستی مانگی پێنجدا کۆتوبەندەکانی ڤایرۆسی کۆرۆنا لە هەرێمەکانی خوزستان و سیستان و بلوخستان لە باشووری وڵاتەکە سەپێندرانەوە، ئەوەش دوای ئەوەی ژمارەی توشبووان بە ڤایرۆسەکە لەو هەرێمانەدا زیادیکرد.
سەرچاوە/ ڕۆیتەرز