سەرۆک وەزیرانی هۆڵەندا مارک ڕوتی لە میانەی کۆبوونەوەکەیدا لەگەڵ سەرۆکی ئەمەریکا جۆو بایدن ئاماژەی بەوەدا " نیازی " هەیە هاوشێوەی ئەڵمانیا سیستمی بەرگری ئاسمانی پاتریۆتی دروستکراوی ئەمەریکایی بدات بە ئۆکرانیا.
سەرۆک وەزیری هۆڵەندا لە کۆشکی سپی بە سەرۆک بایدنی وت " نیازمان هەیە بەشداربین لەوەدا کە ئێوە و ئەڵمانیا لە پڕۆژەی پاتریۆتەکاندا دەیکەن. پێم وایە ئەوە گرنگە و بەشدار دەبین." وتیشی " ئەم بەیانییە لەگەڵ ڕاوێژکاری ئەڵمانیا ئۆلاف شۆڵزیشدا تاوتوێی ئەو بابەتەم کردووە."
لە 5 ی مانگی یەکدا ئەڵمانیا ڕایگەیاند شوێن ئەمەریکا دەکەوێت و یەک سیستمی بەرگری ئاسمانی پێشکەوتووی پاتریۆت دەدات بە ئۆکرانیا.
ڕوتی ئاماژەی بە " گرتە ڤیدیۆیەکی زۆر خراپی " بینایەکی نیشتەجێبوون کرد کە ڕۆژی شەممە لە شاری دنیپرۆی ئۆکرانیا بە موشەکە بەهێزەکانی ڕووسیا کراوەتە ئامانج، وتی " ئەمە وێنەی ترسناکن و پێم وایە سووربوونمان لەوەدا کە لە پاڵ ئۆکرانیادا بمێنینەوە پتەوتر دەکات."
سەرۆک بایدن ستایشی بەشدارییەکەی هۆڵەندای کرد لەو هاوپەیمانێتییەی کە ئەمەریکا ڕابەرایەتی دەکات بۆ پشتیوانیکردنی ئۆکرانیا دژی داگیرکارییەکەی ڕووسیا و وتی " ڕووسیا بەردەوامە لە کارەکانی بە شێوەیەک کە جێی باوەڕکردن نیە."
سەرچاوە/ فرانس پرێس
هۆڵەندا ئاماژە بەوە دەدات ڕەنگە سیستمی پاتریۆت بدات بە ئۆکرانیا
