Accessibility links

ئەندامێکی دیکەی کۆنگرێسی ئەمەریکا تووشی نەخۆشی کۆرۆنا دەبێت


ئەندامێکی دیکەی ئەنجومەنی نوێنەرانی ئەمەریکا تووشی نەخۆشی جۆرە نوێـیەکەی ڤایرۆسی کۆرۆنا بووە، ئەوەی بە COVID-19 ناودێرکراوە.

بەن ماک‌ئادەمز، ئەندامی دیموکرات و نوێنەری ناوچەیەکی ویلایەتی یوتا لە کۆنگرێس ، شەوی چوارشەممە لەسەر تویتەرەکەی نووسی" پاش ئەوەی شەوی شەممە لە واشنتنی پایتەخت گەڕامەوە، تۆزێک هەستم کرد سەرمام بووە، بۆ ڕۆژی یەکشەممە پـرسیارم لە پـزیشکەکەم کرد و دەستبەجی خۆم لە ماڵەکەم کەرەنتینە کرد. هەموو کۆبوونەوەکانم بە ڕێگەی تەلەفۆنەوە ئەنجام دا. نیشانەکانی نەخۆشیـیەکە زیاتربوون و تام لێهات و تووشی کۆکەیەکی وشک بووم و بە قورسی هەناسم بۆ دەدرا. ڕۆژی سێشەممە پـزیشکەکەم ڕێنمایی کردم کە تاقیکردنەوەی پـزیشکی ئەنجام بدەم تاوەکو بزانم تووشی COVID-19 یان نا. چووم بۆ بنکەیەکی تەندروستی و تاقیکردنەوەکەم ئەنجام دا و ئەمڕۆ دەرکەوت تووشی نەخۆشیـیەکە بووم. "

پاشان بەن ماک‌ئادەمزی تەمەن 46 ساڵ گوتی" وەکو هەموو ئەمەریکایـیەک بە ڕۆڵی خۆم هەڵدەستم بۆ نەهێشتنی بڵاوبوونەوەی نەخۆشیـیە. داوا دەکەم بە ڕژدی ئەم مەسەلەیە وەربگرن و بە پـێی ڕێنمایـیە تەندروستیـیەکان بکەن، ئەوانەی لە بنکەکانی نەهیشتنی نەخۆشی و خۆپاراستن پـێمان دەگات."

پـێشتر، ڕۆژی چوارشەممە، ماریۆ دیاز بەلەرت تەمەن 59 ساڵ، ئەندامی کۆماری و نوێنەری ناوچەیەکی فلۆریدا، ئەویش لەسەر تویتەرەکەی ڕایگەیاند تووشی نەخۆشیـيەکە بووە.

نووسیویەتی ئێستا هەست بە باشی دەکات. ئەویش داوای کرد مەسەلەی ئەم ڤایرۆسە بە ڕژدی وەربگرێت و بەپـێی ڕێنمایـیە تەندروستیـیەکان بکەن.

هەتا ئێستا زیاتر لە 9400 کەس لە ئەمەریکا تووشی نەخۆیشی کۆرۆنا بوون، لەوانە 155 کەسیان گەیانیان لە دەست داوە.

XS
SM
MD
LG