ئیدارەی دۆناڵد ترامپ ئەمڕۆ هەینی فایلەکانی پەیوەست بە تەنی ئاسمانی نەناسراو (دیاردەی هەوایی نەزانراو) لەسەر ماڵپەڕی وەزارەتی جەنگ بڵاو دەکاتەوە.
سەدان فایل کە بۆ دەیان ساڵ بە نهێنی هەواڵگری مابوونەوە، ئێستا لە ماڵپەڕی وەزارەتی جەنگ بڵاو کراونەتەوە.
هەندێک لە فایلەکان، کە حکومەت دەڵێت هەتا ئێستا دیاردەی نەزانراون، تایبەتن بە وێنەکانی سەر مانگ لە کاتی گەشتەکانی ساڵی 1969 و 1972.
تیمی ئاسمانگەڕانی ئەمەریکا لەسەر مانگ تێبینی کۆمەڵێک دیاردەی ئاسمانیان کردووە؛ یەکێکیان بریتییە لە دەرکەوتنی زنجیرەی سێ خاڵی لە ئاسمانی مانگ.
وەزارەتی جەنگ لە پەیامێکدا ڕایگەیاند بڵاوکردنەوەی ئەو فایلانە هێمایەکە بۆ گرینگیدانی ئیدارەی سەرۆک ترامپ بە "ئەوپەڕی شەفافیەت بۆ خەڵک،" بۆ ئەوەی لە کۆتاییدا بڕیاری خۆیان بدەن سەبارەت بەو زانیاریانەی کە لەم فایلانەدا هەن."
