ژەنەڕاڵ دان کەین، سەرۆکی ستونە هاوبەشەکانی لەشکری لە ڕۆژانی سێشەمە و چوارشەممەی ئەم هەفتەیەدا میوانداری یەکەمین کۆنفڕانسی بەرپرسانی بەرگری نیوەگۆی ڕۆژئاوای کرد. لەو کۆنفرانسەدا بەرپرسە بەرگرییەکان و نوێنەرانی باڵای سەربازی لە 34وڵات بەشدار بوون بۆ ئەوەی لەسەر ئەرکە سەرەکییە هاوبەشەکانی ئاسایش لە نیوەگۆی ڕۆژئاوا گفتوگۆ بکەن.
پاش کۆنفرانسەکە بەیاننامەیەکی هاوبەشیان بڵاو کردەوە و تیایدا هاتووە کۆنفرانسەکە بە سەرۆکایەتی وەزیری جەنگ پیت هەگسێت ئەنجام دراوە و سەرکردە باڵاکانی بەرگری ئەمەریکا، لەنێویاندا جێگری سەرۆکی ئەرکانی هاوبەشەکان، فەرماندەکانی فەرماندەیی ئەمەریکای باکوور و باشوور و سەرۆکی ئۆفیسی پاسەوانی نیشتمانیش تیایدا بەشداربوون.
لە ماوەی کۆنفرانسەکەدا، وەزیری جەنگ لە سەر گەڕاندنەوەی هێز و دەستەڵاتی ئەمەریکا لە نیوەگۆی ڕۆژئاوا لە ڕێگەی ئەولەویەت و بەرژەوەندییە هاوبەشەکانەوە لەگەڵ وڵاتانی هاوبەشدا جەختی کردەوە. هەر وەک لە بەیاننامەکەدا هاتووە، "بەرپرسانی بەرگری و نوێنەرە باڵاکانی لەشکری" لەو کۆنفرانسەدا بەشداربوون " بۆ چارەسەرکردنی ئاستەنگە هاوبەشە ئەمنییەکانی ناوچەکە سەبارەت بە بەشداریکردن و هاوکاری بەردەوامی لایەنی سەربازییان." هەروەها ژەنەڕاڵ کەین تیشکی خستە سەر گرنگی پێکهێنانی متمانە و قووڵکردنەوەی پەیوەندییەکان و کارکردنی هاوبەش بۆ پێشخستنی ئاسایشی بەکۆمەڵ لە سەرانسەری نیوەگۆی ڕۆژئاوادا.
لە بەشێکی دیکەی بەیاننامەکەدا هاتوە کە لەسەر ئاستەنگە هاوبەشەکانی ئاسایشی هەرێمی گفتوگۆکرا لە نێویاندا: ڕێکخراوە تاوانکارییە نێودەوڵەتییەکان و بازرگانیکردن بە ماددە هۆشبەرەکان، هەروەها پرسە فراوانەکان کە کاریگەرییان لەسەر سەقامگیری لە سەرانسەری نیوەگۆی زەویدا هەیە. کۆنفرانسەکە دەرفەتێکی بۆ سەرۆکەکانی بەرگری ڕەخساند تا دیدگاکانیان ئاڵوگۆڕ بکەن و پەیوەندییەکان بۆ پشتگیریکردنی ئاسایشی هاوبەش و نیوەگۆی ڕۆژاوایەکی سەقامگیر و پارێزراو بەهێزبکەن.