وەزارەتی دادی ویلایەتە یەکگرتووەکانی ئەمەریکا ڕۆژی هەینی 17ی ئەم مانگە ڕایگەیاند کە دادگایەکی وڵاتەکە دوو کەسی لە ویلایەتی تەکساس سزا داوە بە تۆمەتی هەوڵدان بۆ فرۆشتنی نەوتی ئێران و پێشێلکردنی سزاکانی ئەمەریکا و پیلانگێڕی بۆ ئەنجامدانی سپیکردنەوەی پارە.
جەنیو وانگی تەمەن 42 ساڵ و دانیال ڕەی ڵەینی تەمەن 42 ئەو دوو تۆمەتبارەن کە ڕۆژی چوارشەممە دادگایەکی تەکساس هەریەکەیانی بە 45 ساڵ زیندانیکردن سزا دا.
وەزارەتی دادی ئەمەریکا لە بەیاننامەیەکدا ڕایگەیاند ئەو دووانە پلانیان هەبووە نەوت لە ئێران بکڕن و سەرچاوەکەی بشارنەوە و دواتر بیفرۆشن بە پاڵاوگەیەک لە چین.
دانیال ڕەی ڵەین سەرۆکی کۆمپانیای ستاک ڕۆیەڵتیسە (Stack Royalties, LLC) کە کۆمپانیایەکی تایبەتە و بنکەکەی لە ویلایەتی تەکساسە و مافی کانزاکانی نەوت و گاز بە سندوقەکانی وەبەرهێنان و گروپەکانی کەرتی تایبەت دەفرۆشێت.
ئەو دوو کەسە لەگەڵ سێ کەسی دیکە لە ساڵی 2020 لە دادگای ناوچەیی ویلایەتە یەکگرتووەکانی ئەمەریکا لە ویلایەتی پێنسیلڤانیا تۆمەتبار کرابوون. بەڵگەنامەکانی دادگا دەریدەخەن کە ئەو دوو هاوبەشە لەو کاتەوە دانیان بە تاوانەکانیاندا ناوە.
مات ئۆلسن، سەرۆکی بەشی ئاسایشی نیشتمانی وەزارەتی دادی ئەمەریکا لە بەیاننامەیەکدا ڕایگەیاندووە "وەزارەتی داد چاوپۆشی لەو کەسانە ناکات کە سزاکانی ئەمەریکا پێشێل دەکەن و لە پێناو بەرژەوەندی تایبەتی خۆیاندا ئاسایشی نیشتمانیمان دەخەنە بەر مەترسییەوە."
دوای ئەو سزایانەی کە دانۆڵد ترامپ سەرۆکی پێشووی ویلایەتە یەکگرتووەکانی ئەمەریکا لە ساڵی 2018دا بەسەر کەرتی هەناردەکردنی نەوتی ئێراندا سەپاندویەتی، چین تاکە هاوردەکاری سەرەکی نەوتی ئێرانە لە جیهاندا.
سەرچاوە/ ڕۆیتەرز