پارتی دیموکراتی گەلان (هەدەپە) و پارتی چەپی سەوز کۆنگرەیەکی ڕۆژنامەوانییان لە ئانکەرە سەبارەت بە گەڕی دووهەمی هەڵبژاردنەکانی سەرۆکایەتی تورکیا ئەنجامدا.
لە کۆنگرە ڕۆژنامەوانییەکەدا، هەریەک لە هاوسەرۆکەکانی هەدەپە پەروین بوڵدان و میتات سانجار و هاوسەرۆکەکانی پارتی چەپی سەوز چیگدەم کلیگون و ئیبراهیم ئامادەبوون.
بوڵدان ڕایگەیاند، ئامانجی سەرەکییان شکستپێهێنانی ڕەجەب تەیب ئەردۆغان، سەرۆککۆماری تورکیایە.
دەشڵێت "بێ دوودڵی دەچینە سەر سندوقەکانی دەنگدان و پێکەوە ڕژێمی تاکە کەسی دەگۆڕین. هەڵبژاردنی خولی دووهەم ڕیفراندۆمە و بڕیار دەدرێت لەسەر ئەوەی دیموکراسیمان دەوێت یان ڕژێمێکی تاکەکەسی."
بوڵدان گوتیشی بەردەوام دەبێت لە تێکۆشانی بۆ پاشەڕۆژێکی دیموکراسیانە.
کەمال کلیچدارئۆغڵو کاندیدی هاوپەیمانی نیشمانی و ئومیت ئۆزداغ سەرۆکی پارتی زەفەر، ڕۆژی چوارشەممە کۆبوونەوە و ڕێککەوتنێکیان واژۆ کرد.
پارتی زەفەر (سەرکەوتن) بە گوتارەکانی دژ بە کۆچبەرانی سوریا و پارتەکانی پشتیوانی کورد ناسراوە.
بوڵدان لە کۆنگرە ڕۆژنامەوانییەکەدا ڕایگەیاند کە کۆچبەران و پەنابەران نابێت بابەتی بەرژەوەندی سیاسی بن، بەڵام ڕاستەوخۆ هیچی لەبارەی پشتگیریکردنی کلیچدارئۆغڵو نەگوت.
سەرچاوە: تویتەر، هەدەپە
