وەزارەتی دەرەوەی ڕووسیا ڕۆژی شەممە ڕایگەیاند ڕێگەی چوون بۆ وڵاتەکەی لە سەرۆک وەزیرانی بەریتانیا بۆرس جۆنسن، وەزیری دەرەوە لیز ترەس، وەزیری بەرگری بێن واڵس و 10 سیاسەتمەدار و ئەندامی تری حکومەتی بەریتانیا گرتووە.
وەزارەتەکە ڕایگەیاند ئەم هەنگاوە بەهۆی " کرداری دوژمنکارانەی بێپێشینەی حکومەتی بەریتانیایە بەتایبەتی لەسە هەڵوێستەکانی سزاکانی دژ بە کاربەدەستە باڵاکانی ڕووسیا" و وەزارەتەکە دەشڵێت لە ماوەی داهاتوودا لیستی ئەو ناوانە زیاتریش دەکات.
جۆنسن کە یەکێکە لە پشتیوانە هەرە بەهێزەکانی ئۆکرانیا لە لایەن کرێملنەوە بە " چالاکترین بەشداربوو لە پێشبڕکێی دژایەتی کردنی ڕووسیا" دادەنێت.
هەفتەی ڕابردوو جۆنسن سەردانی کیێڤی پایتەختی ئۆکرانیای کرد و لەوێ لەگەڵ سەرۆکی ئۆکرانیا ڤلۆدیمیر زێڵینسکی ستایشی یەکتریان کرد بۆ هاوکارییەکانیان لەو کاتەوەی داگیرکارییەکانی ڕووسیا لە ئۆکرانیا دەستیپێکردووە کە مۆسکۆ بە " ئۆپەراسیۆنێکی تایبەت" ناودێری دەکات.
گوتەبێژێکی حکومەتی بەریتانیا لە وەڵامی بڕیارەکەی مۆسکۆ بۆ قەدەغەکردنی جۆنسن و سیاسەتمەدارانی تری بەریتانیا لە چوونە ناو وڵاتەکەوە گوتی " بەریتانیا و هاوبەشەکانی تری جیهانی یەکگرتوون لە سەرزنشتکردنی کردارە شەرمەزارییەکانی حکومەتی ڕووسیا لە ئۆکرانیا و داوا لە کرێملن دەکەن شەڕەکە ڕاگرێت."
ئەو گوتەبێژە گوتیشی " ئێمە بەردەوام دەبین لە پشتیوانیکردنی خۆمان لە ئۆکرانیا."
