سەرۆک دانۆڵد ترامپ دەڵێت وتاری ساڵانەی لەسەر ڕەوشی وڵات دووا دەخات هەتا ئەو کاتەی کۆنگرێس بابەتی داخستنی بەشێک لە کارەکانی حکومەت چارەسەر دەکات.
ئێوارەی چوارشەممە سەرۆک ترامپ لە تویتێکدا ڕایگەیاند " من بە دوای شوێنێکی تر بۆ وتاری ساڵانە لەسەر ڕەوشی وڵات ناگەڕێم چونکە هیچ شوێنێک نییە لە ڕووی مێژوو و نەریتەوە بتوانێت بە ئەندازەی ئەنجومەنی نوێنەران گرنگی هەبێت، چاوم لەوەیە لە داهاتوویەکی نزیکدا وتارێکی گرنگ لە سەر ڕەوشی وڵات پێشکەش بکەم."
As the Shutdown was going on, Nancy Pelosi asked me to give the State of the Union Address. I agreed. She then changed her mind because of the Shutdown, suggesting a later date. This is her prerogative - I will do the Address when the Shutdown is over. I am not looking for an....
— Donald J. Trump (@realDonaldTrump) January 24, 2019
پێشتر کۆشکی سپی ڕایگەیاند بەردەوامە لە پـلانەکانی بۆ بڵاوکردنەوەی وتارێکی تەلەفیزیۆنی سەرۆک دانۆڵد ترامپ لەسەر ڕەوشی وڵات لە ئێوارەی 29 ی مانگی یەک.
کاربەدەستانی کۆشکی سپی ڕاشیانگەیاند، پلانی ئالتەرناتیڤیش هەن بۆ پیشکەشکردنی وتارەکە کە لە شوێنێکی ترەوە پێشکەش بکرێت لە ناویاندا لە کۆبونەوەیەکی سیاسیدا.
جێگری گوتەبێژی کۆشکی سپی هۆگان جیدلی سەرلەبەیانی ڕۆژی سێشەممە لە کەناڵی فۆکس نیوز ڕایگەیاند " نانسی پـلۆسی بۆی نیـیە بە سەرۆک بڵێت کەی و لە چ کاتێک بۆ هاوڵاتیانی ئەمەریکا قسە بکات."
لە هەفتەی ڕابردوو پـلۆسی داوای لە ترامپ کرد وتارەکەی دوابخات یان بیدات بە یاسادانەران. ئەو نیگەرانی لەمەڕ ئاسایشی دەربڕی، ئاماژەی بەوە کرد بەشێک لە دەزگای پاراستنی کاربەدەستە باڵاکانی ئەمەریکا و وەزارەتی ئاسایشی نیشتمانی بەر داخستنەکەی حکومەتی فیدراڵی ئەمەریکا کەوتوون کە لە کۆتایی مانگی دوازدەوە بەردەوامە.
کۆشکی سپی نکوڵی لەوە دەکات هیچ گرفتێک هەبێت بۆ دابینکردنی ڕێوشوێنی ئاسایشی ئەو ڕێوڕەسمە، سەرەڕای داخستنی هەندێک لە دەزگاکانی حکومەتی ئەمەریکا.
لە هەنگاوێکدا کە وەکو تۆڵەکردنەوە دژ بە سەرۆکی ئەنجومەنی نوێنەران دادەنرێت ترامپ ڕێگەی نەدا پـلۆسی فڕۆکەی لەشکری ئەمەریکا بەکاربهێنێت بۆ گەشتێکی شاندێکی کۆنگرێس بۆ سەردانیکردنی سەربازانی ئەمەریکا لە ئەفغانستان.