سەرۆکی ویلاتە یەکگرتووەکانی ئەمەریکا دەڵێت ئەگەر هەرچیـیەک لە وڵاتدا ڕووبدات ئەوا ئۆباڵەکەی بخەنە ئەستۆی ئەو دادوەرەی جێبەجێکردنی بڕیارەکەی ڕاگرت بۆ وەستانی کاتی هاتنی هاوڵاتیانی حەوت وڵات بۆ ناو ئەمەریکا.
دانۆڵد ترامپ دوێنێ لە تویتێکیدا نووسیویەتی " بڕواناکرێت دادوەرێـک وڵاتەکەمان بخاتە بەردەم مەترسیـیەکی لەم جۆرەوە. ئەگەر شتێـک ڕوویدا ئەوا لۆمەی ئەو و سیستەمی دادوەری بکەن. ئیدی خەڵک بە لێشاو دێن. شتێـکی خراپە."
Just cannot believe a judge would put our country in such peril. If something happens blame him and court system. People pouring in. Bad!
— Donald J. Trump (@realDonaldTrump) February 5, 2017
شەوی هەینی ڕابردوو جەیمس ڕۆبەرت دادوەری فیدراڵی لە ویلایەتی واشنتن بە شێوەیەکی کاتی جێبەجێکردنی فەرمانەکەی سەرۆک ترامپی ڕاگرت، ئەوەی هەفتەیەک پـێشتر دابووی بۆ وەستاندنی هاتنی هاوڵاتیانی ئێران و عێراق و سوریا و لیبیا و سۆماڵ وسودان و یەمەن بۆ ناو ئەمەریکا.
ڕۆژی یەکشەممەش دادگای 9 ی پـیاداچوونەوەی ئەمەریکا لە سانفرانسیسکۆ تانەکەی بەڕێوەبەرایەتی سەرۆک ترامپی ڕەتکردەوە کە داوای کردبوو بڕیاری دادوەر جەیمس ڕۆبەرت هەڵبوەشێنتەوە.
پاش ئەم بڕیارەی دادگا، سەرۆک ترامپ لە تویتەرەکەی نووسیویەتی " فەرمانم بە وەزارەتی ئاسایشی نیشتمانی کردووە زۆر بە وردی پشـکنین بۆ ئەو کەسانە بکەن کە دێنە ناو وڵاتەکەمانەوە. دادگاکان کارەکەیان زۆر قورس کردووە."
I have instructed Homeland Security to check people coming into our country VERY CAREFULLY. The courts are making the job very difficult!
— Donald J. Trump (@realDonaldTrump) February 5, 2017