بەگوێرەی ڕاپۆرتی وەزارەتی ناوخۆی بەحرەین، لە بەرەبەیانی ڕۆژی پێنجشەممەوە سێ جار زەنگی ئاگادارکردنەوە لە بەحرەین لێدراوە.
کاربەدەستانی بەحرەین داوایان لە هاووڵاتیان کردووە پابەندی ڕێنماییەکانی سەلامەتی بن و لە شوێنە پارێزراوەکاندا بمێننەوە تا ئەو کاتەی دۆخێکی نوێ ڕادەگەیەنرێت.
پێشتر فەرماندەیی گشتیی هێزە چەکدارەکانی بەحرەین ڕایگەیاندبوو کە بە "ئیرادەیەکی بەهێز و ئامادەیی بەرزی شەڕ"، سیستەمی بەرگری ئاسمانی هێزی بەرگری بەحرەین بەرەبەیانی ڕۆژی پێنجشەممە بەرپەرچی ژمارەیەک "هێرشی ئاسمانی خیانەتکارانەی ئێران"ی دایەوە و ڕێگری لێکرد و لەناوی برد.
سوپای بەحرەین جەختی لەوە کردەوە کە بەکارهێنانی مووشەک و فڕۆکەی بێفڕۆکەوان بۆ بەئامانجگرتنی خەڵکی مەدەنی و موڵک و ماڵی هاووڵاتیان پێشێلکارییەکی ئاشکرای یاسای مرۆیی نێودەوڵەتییە.
پێشتر لەشکر و سوپای پاسدارانی ئێران ڕایانگەیاندبوو لە کاردانەوە بەرامبەر هێرشەکانی ئەمەریکا هێرشی مووشەکی و فڕۆکەی بێفڕۆکەوانیان بۆ سەر کوەیت، قەتەر و بەحرەین ئەنجامداوە.
هێرشەکانی ئەمەریکا دوای هێرشەکانی کۆماری ئیسلامی بۆ سەر کەشتییە بازرگانییەکان لە تەنگەی هورمز ڕوویدا.