هاوکاتی سەردانەکەی سەرۆک دۆناڵد ترامپ بۆ چین، ڕۆژی چوارشەممە نرخی دۆلار لە بازاڕی دراویدا بەرز بووەوە و بەرزترین ئاستی لە ماوەی دوو هەفتەدا تۆمارکرد. بازاڕەکان سەرنجیان لەسەر دانوستانەکانی بەیجینگ بوو کە بڕیارە لە نێوان سەرۆک ترامپ و سەرۆکی چین شی جینپینگ دەستپێبکات.
وەزارەتی کاری ئەمەریکا ڕایگەیاندووە، پێوەرەکانی نرخی بەرهەمهێنەر بۆ خواستی کۆتایی مانگی ڕابردوو بە ڕێژەی 1.4% بەرزبووەتەوە، کە گەورەترینە لە مانگی سێی 2022ەوە و زۆر زیاترە لە خەمڵاندنی 0.5%ی ئابووریناسان کە لەلایەن ڕۆیتەرزەوە ڕاپرسییان لەسەر کراوە.
لە ماوەی 12 مانگیدا تا مانگی چوار، پێوەرەکانی نرخی بەرهەمهێنەر 6.0% بەرزبوونەوەی بەخۆیەوە بینی، کە گەورەترین زیادبوونە لە مانگی دوازدەی ساڵی 2022 وە تا ئێستا.
برایەن جەیکەبسن سەرۆکی ئابووری لە کۆمپانیای ئەنێکس واڵت مەنجەمەنێت (Annex Wealth Management) لە شاری مێنۆمۆنی فۆڵس لە ویلایەتی ویسکۆنسێن دەڵێت "ئەم پەرەسەندنە زۆر بە خێرایی دەڕوات".
ترامپ و شاندی یاوەری لەنێویاندا جێنسن هوانگی کۆمپانیای نڤیدیا و ئیلۆن ماسک لە ڕۆژی چوارشەممە پێشوازییەکی گەورەیان لە بەیجینگ لێکرا. سەرۆک ترامپ ڕایگەیاندووە لە سەرەتای لوتکەی دوو ڕۆژەیاندا داوای "کرانەوە" بەڕووی بازرگانی ئەمەریکادا لە شی دەکات.
نرخی یوانی چینی CNH= بەڕێژەی 0.03% بەرامبەر بە گرینباک بەهێزبوو بۆ 6.789 بۆ هەر دۆلارێک دوای ئەوەی گەیشتە 6.7852، کە بەهێزترین ئاستە لە مانگی دووی 2023ەوە.