سکۆت بێسێنت وەزیری گەنجینەی ئەمەریکا ڕۆژی چوارشەممە لە پایتەختی کۆریای باشوور سێ کاتژمێر وتووێژی لەگەڵ جێگری سەرۆکی چین هێ لیفینگ ئەنجامدا، بە مەبەستی ئامادەکاری دانانی سەکۆی کۆبوونەوە مێژووییەکانی پێنجشەممە و هەینی لە نێوان سەرۆک دۆناڵد ترامپ و هاوتا چینیەکەی شی ژین پینگ لە بەیجینگ.
چاوەڕوان دەکرێت سەرکردەکانی دوو گەورەترین ئابووری جیهان باس لە پرسەکانی بازرگانی، باج، وزە، کانزای زەوی دەگمەن، ژیری دەستکرد و ئێران بکەن. وەزیری گەنجینە لە کۆتاییەکانی ڕۆژی چوارشەممەدا دەچێت بۆ بەیجینگ بۆ ئامادەبوون لە کۆبوونەوەکانی سەرۆک ترامپ لەگەڵ بەرپرسانی چین.
بێسێنت و هی، کە لە هۆڵی پێشوازی ڤی ئای پی لە فڕۆکەخانەی نێودەوڵەتی ئینچۆن لە دەرەوەی سیئۆل کۆبوونەوە. چاوەڕوان دەکرا بچنە ناو وردەکارییەکانی پرسە ئاڵۆزە ئابووری و بازرگانییەکانی نێوان هەردوو وڵات، هەرچەندە بەرپرسانی ئەمەریکا و چین هیچ وردەکارییەکیان لەبارەی دانوستانەکانەوە نەخستووەتە ڕوو.
بە گوێرەی نوسینگەی سەرۆکی کۆریای باشوور، لە سەرەتای ڕۆژی چوارشەممەدا هی و بێسێنت بە جیا لەگەڵ سەرۆکی کۆریای باشوور، لی جای میونگ، لە کۆشکی سەرۆکایەتی کۆریای باشوور کۆبوونەتەوە.
وتەبێژی سەرۆکی کۆریای باشوور ڕایگەیاند لە کۆبوونەوەکەیدا لەگەڵ جێگری سەرۆکی چین، لی جای میونگ ڕایگەیاندووە لە بەرژەوەندی کۆریای باشوور و تەواو جیهاندایە کە ئەمەریکا و چین پەیوەندییەکی سەقامگیر پەرەپێبدەن.
وتەبێژی سەرۆکی کۆریای باشوور کانگ یو جونگ لە کۆنگرەیەکی ڕۆژنامەوانیدا ڕایگەیاند، سەرۆکی کۆریای باشوور و بێسێنت باسیان لە زنجیرەکانی خستنەڕوو و کانزا گرنگەکان کردووە.
هەروەها دانوستانکاری سەرەکی بازرگانی چین، جێگری وەزیری بازرگانی لی چێنگگانگ، وە لیاو مین جێگری وەزیری دارایی چین یاوەری جێگری سەرۆکی چینیان کرد لە سەردانەکەیدا بۆ کۆریای باشوور.
بەرپرسانی ئەمەریکا ڕایانگەیاندووە، چاوەڕوان دەکرێت سەرکردەکانی لوتکەی بەیجینگ واژۆ لەسەر دامەزراندنی ئەو کۆڕبەندییانە بکەن کە پێویستن بۆ خێراترکردنی زیاتری بازرگانی و وەبەرهێنانی هاوبەش. جگە لەوەش، بڕیارە چین کڕینەکانی پەیوەست بە فڕۆکەکانی بۆینگ و بەرهەمە کشتوکاڵییە ئەمەریکاییەکان و وزە ڕابگەیەنێت.
