مارکۆ ڕوبیۆ وەزیری دەرەوەی ئەمەریکا ڕۆژی پێنجشەممە لەگەڵ ئیڤێت کوپەر وەزیری دەرەوەی بەریتانیا سەبارەت بە "هەنگاوەکانی داهاتوو دوای ئاگربەست" لەگەڵ کۆماری ئیسلامی ئێران قسەی کرد.
وەزارەتی دەرەوەی ئەمەریکا ڕایگەیاند تەوەری دیکەی ئەم گفتوگۆیانە بریتی بووە لە "پێویستی بەپەلە"ی گەڕاندنەوەی ئازادی کەشتیوانی لە تەنگەی هورمز.
وەزارەتەکە دەڵێت گەڕاندنەوەی ئازادی کەشتیوانی بۆ تەنگەی هورمز پێویستە بۆ ئەوەی کەشتییە بازرگانییەکان بە ئازادی بە ڕێگەی تەنگەی هورمزەوە تێپەڕن و سەرچاوەکانی وزە بگەنە بازاڕە جیهانییەکان.
کۆماری ئیسلامی سەرەڕای داخستنی تەنگەی هورمز، ڕایگەیاندووە دەیەوێت لەو کەشتییانەی بە تەنگەی هورمزدا تێدەپەڕن، باج وەربگرێت. شارەزایان ئەم هەوڵە بە کارێکی نایاسایی دەزانن.
تۆڕی فۆکس نیوز لە ڕاپۆرتێکدا کە ڕۆژی پێنجشەممە بڵاوی کردەوە، نووسیویەتی ئەمەریکا خۆی بۆ ڕووبەڕووبوونەوەی بەلەمە خێراکانی کۆماری ئیسلامی ئامادە دەکات. بەگوێرەی ڕاپۆرتی فۆکس نیوز، ئەو پلانەی کە پێدەچێت بۆ بەئامانجگرتنی ئەم بەلەمانە بەکاربهێنرێت، پێشتر لە هێرشە کوشندەکانی ئەمەریکا بۆ سەر کەشتییە بچووکەکان کە پەیوەندییان بە تۆڕەکانی بازرگانیکردن بە ماددە هۆشبەرەکانەوە هەبوو، لە کەناراوەکانی کاریبی و ڕۆژهەڵاتی زەریای هێمن بەکارهێنراوە.
