وەزیری دەرەوەی ئەمەریکا لە قاهیرە لەگەڵ عەبدولفەتاح سیسی سەرۆکی میسردا کۆبووەوە لە کۆتایی سەردانەکەیدا بۆ ڕۆژهەڵاتی ناوەڕاست، هاوکاتی کێشە و ئاڵۆزیی دیپلۆماتیانەی نێوان ئیسرائیل و وڵاتانی دراوسێی لە ناوچەکەدا سەبارەت بە شەڕی غەززە.
دیدارەکەی ڕۆژی پێنجشەممەی ئەنتۆنی بلینکن و سەرۆکی میسر، یەک ڕۆژ دوای کۆبوونەوەکەی بلینکن بوو لەگەڵ شاعەبدوڵای پادشای ئوردن و مەحمود عەباس، سەرۆکی دەسەڵاتی فەلەستینییەکان لە بەندەری عەقەبەی سەر دەریای سوور.
واشنتن بەردەوامە لە هەوڵەکانی بۆ هێورکردنەوەی ململانێکان و قەیرانی ناوچەکە، هاوکاتی نیگەرانییەکان لەوەی ئەو قەیرانەی ئێستای ڕۆژهەڵاتی ناوەڕاست تەشەنە بکات و بگاتە لوبنان و عێراق و بشبێتە گرفتێکی ئاسایشی بۆ هاتووچۆی کەشتییە بازرگانییەکان لە دەریای سووردا.
بەپێی ڕاگەیەندراوەکانی وەزارەتی تەندروستی لە کەرتی غەززە؛ شەڕەکانی حەماس و ئیسرائیل بوونەتە مایەی کوژرانی زیاتر لە 23 هەزار فەلەستینی.
میسر و شانشینی ئوردن دوای کۆبوونەوەکان هۆشدارییان دا و داواش دەکەن ئیسرائیل کۆتایی بە هێرشەکانی بێنێت و نابێت ئەم قەیرانە ببێتە هۆکارێک بۆ ئاوارە بوونی 2.3 ملیۆن دانیشتوانی ناوچەکە و ناشبێت ئەم قەیرانە بە داگیرکاریی ئیسرائیل بۆ ناوچەکە کۆتایی پێبێت.
ئیسرائیل و ئەمەریکای هاوپەیمانیشی جەخت دەکەنەوە لەوەی تەلئەڤیڤ ئاوەها پلانێکی نییە.
ڕۆژی 7ی مانگی 10 ساڵی ڕابردوو، چەکدارەکانی حەماس هێرشیان کردە سەر ئیسرائیل و لە ئاکامی ئەو هێرشە 1200 هاووڵاتی ئیسرائیلی کوژران و زیاتر لە 200 کەسیش بە بارمتە گیران.
ئەنتۆنی بلینکن، وەزیری دەرەوەی ئەمەریکا، لە یەک هەفتەدا سەردانی 9 وڵات و هەروەها کەناری ڕۆژئاوای فەلەستینییەکانیشی کرد. بەرەنجامی ئەو هەفتە دیپلۆماتییەی وەزیری دەرەوەی ئەمەریکا ڕێککەوتنێکی قورسی نێوان ئیسرائیل و وڵاتانی دراوسێی بوو بۆ ئاوەدانکردنەوەی کەرتی غەززە لە دوای ئەم قەیرانە خوێناوییە و هەروەهاش درێژەدان بە زەمینەیەکی هاوبەشی ئابوری لە نێوان ئیسرائیل و وڵاتانی دراوسێیدا، ئەڵبەت ئەو کاتەی ئیسرائیل وابەستە دەبێت بە دەوڵەتێکی سەربەخۆی فەلەستینییەکانەوە.
سەرچاوە: ڕۆیتەرز