کاربەدەستان دەڵێن ئەنجامدەری تەقینەوەکەی ناشڤێڵ لە ڕووداوەکەدا گیانی لەدەستداوە

لێکۆڵەرانی ئەمەریکا بەردەوامن لە لێکۆڵینەوەکانیان لەسەر ئەوەی بزانن مەبەست لە تەقینەوەکەی ڕۆژی هەینی شاری ناشڤێڵی ویلایەتی تێنسی باشوری ئەمەریکا چی بووە کە بووە هۆی برینداربوونی سێ کەس و زیانگەیاندن بە چەندین باڵەخانەو بڕینی سیستمی پەیوەندییەکان.

کاربەدەستان ڕۆژی یەکشەممە ئەنتۆنی قوین وارنەری تەمەن 63 ساڵیان وەکو ئەنجامدەری تەقینەوەی ئۆتۆمبێلێک لە گەڕەکێکی ناشڤێڵ کە پڕە لە باڕ و ڕێستورانتی میوزیکی لادیەیی ( کەنتری) ڕاگەیاند.

داواکاری گشتی ئەمەریکا بۆ ناوچەی ناوەندی تێنسی دانۆڵد کاکران لە کۆنفرانسێکی ڕۆژنامەگەریدا ڕایگەیاند " ئێمە گەیشتووین بەو ئەنجامەی کەسێک بە ناوی ئەنتۆنی وارنەر تەقینەوەکەی ئەنجام داوە و لە کاتی تەقینەوەکەدا خۆی لەوێ بووەو تیاچووە."

ئێف بی ئای (FBI) دەڵێت لێکۆڵەرانی و ئەوانەی کە لە بەشی خواردنەوە کحولییەکان، توتن، چەک و تەقەمەنی کاردەکەن بەردەوامن لە گەڕان و شیکردنەوەی بەڵگەکان. ناوچەی دەوروبەری تەقینەوەکە ڕۆژی دووشەممە بە داخراویی ماوەتەوە.

هەروەها FBI لە بەیاننامەکەی شەوی یەکشەممەدا دەشڵێت " مەبەستی ئەنجامدانی ئەو کارە هێشتا نادیارە و هێشتا بەدوواداچوونەکان بەردەوامن، بەڵام لەمکاتەدا هیچ ئاماژەیەک نییە بۆ ئەوەی کەسێکی تریش دەستی تێدا هەبووبێت."