باڵیۆزخانەی ئەمەریکا لە تورکیا هاوڵاتیانی ئەمەریکای ئاگادار کردەوە لە ئەگەری ڕوودانی هێرشی تیرۆریستی دژی کڵێسا و پەرستگا و نێردە دیبلۆماتییەکان لە ئیستەنبوڵ، لە ماوەی چوار ڕۆژدا ئەمە دووەمین ئاگادارکردنەوەی ئەمەریکایە بۆ هاوڵاتیانی لەو وڵاتەدا، هەروەها دوای ڕووداوەکانی سوتاندنی قورئان دێن لە ئەوروپا.
باڵیۆزخانەی ئەمەریکا لە ئاگادارییەکی ئاسایشدا دەڵێت " ئەگەری ڕوودانی هێرشی تۆڵەکردنەوەی تیرۆریستی هەیە " لەو شوێنانەی کە ڕۆژئاواییەکان بەردەوام بۆیان دەچن، بە تایبەتی گەڕەکەکانی وەکو بیۆگلۆ و گالاتا و تەقسیم و ئیستیقلالی ئیستەنبوڵ.
گوتیشی بەرپرسانی تورکیا لێکۆڵینەوە لە بابەتەکە دەکەن.
ڕۆژی هەینی چەند باڵیۆزخانەیەکی وڵاتانی جیهان لە ئەنکەرە بە ئەمەریکا و ئەڵمانیا و فەڕەنسا و ئیتاڵیاشەوە ئاگادارکردنەوەیان بڵاوکردەوە لەسەر ئەگەری ڕوودانی هێرشی تۆڵەکردنەوە دژی شوێنەکانی پەرستن، ئەوەش دوای ڕووداوەکانی سوتاندنی قورئانی پیرۆزی موسوڵمانان لە سوید و هۆڵەندا و دانیمارک.
ڕۆژی شەممە تورکیاش بە هەمان شێوە هاوڵاتیانی خۆی لە ئەمەریکا و ئەوروپا ئاگادار کردەوە سەبارەت بە مەترسی " هێرشی ئیسلامۆفۆبیا و ترس لە بێگانە و ڕەگەزپەرستی " لە ئەمەریکا و ئەوروپادا.
سەرچاوە/ ڕۆیتەرز
