بەڕێوەبەرایەتی دۆناڵد ترەمپی سەرۆکی ویلایەتە یەکگرتووەکانی ئەمەریکا وا فشاری توند دەکات بۆ ئەوەی مەسەلەی سنووری باشوری وڵات لەگەڵ مەکسیک بە قەیرانێکی مرۆیی و ئاسایشی نیشتمانی وێنا بکات، ئەمەش لە پێناو ئەوەی بوجە بۆ بنیاتنانی ئەو دیوارە بەربەستە سنووریە بەدەست بێنێت، ئەو کارەی ململانێی لەگەڵ یاسادانەرانی لێکەوتووەتەوە و بووەتە مایەی داخستنی نیمچەیی دامودەزگاکانی حوکمەتی فیدراڵی، کە ئەمڕۆ سێشەممە پێیناوەتە 18 هەمین رۆژەوە.
بڕیارە سەرۆک ترەمپ شەوی سێشەممە لە وتارێکی پەخشی تەلەفیزیۆنی بۆ وڵات ، مەسەلەی دابینکردنی بوجە بۆ بنیاتنانی ئەو دیوارە بەربەستە سنووریە بکاتە تەوەرەی وتارەکەی. ئەمەش بەر لەوەی رۆژی پێنجشەممەی داهاتوو سەرۆک ترەمپ سەردانی ئەو ناوچە سنووریەی نێوان ئەمەریکا و مەکسیک بکات.
سەرۆکی دیموکراتەکان لە ئەنجومەنی سەنات " چەک شومەر" رۆژی دووشەمە لە نیویۆرک گوتی" ئەگەر کۆنگرێس مل بۆ داواکەی سەرۆک ترەمپ کەچبکات پەیوەست بە دابینکردنی بوجە بۆ بنیاتنانی دیواری سنووری نێوان ئەمەریکا و مەکسیک، ئەوە کارەساتی لێدەکەوێتەوە" . دەشڵێت ئەمە شیوازی بەڕێوەبردن نییە و پێداگری بکەیت و زیان بە ملیۆنەها کەس بگەیەنیت ، ئەگەر ئەوەی سەرۆک ترەمپ دەیەوێت بەدەستی نەهێنێت . هەروەها دەشڵێت دەستورمان وا ناڵێت. سەنەتۆر چەک شومەر ئاماژەی بەوە کرد و گوتی ئەو کاتەی کۆماریەکان زۆرینەبوون لە ئەنجومەنی نوێنەران و سەناتدا ، سەرۆک ترەمپ نەیتوانی مەسەلەی بنیاتنانی ئەو دیوارە سنووریە بەربەستە تێپەڕێنێت ، چونکە کۆماریـیەکان زانیان ئەوە بیرۆکەیەکی خراپە. بەڵام ئێستا سەرۆک ترەمپ حوکمەتی ئەمەریکای بە نیمچەیی لە کارخستوە و چیتر کۆماریـیەکان لە ئەنجومەنی نوێنەرانیش زۆرینە نین.