Accessibility links

تیلەرسن: ئەمەریکا دان‌نانێت بە ڕیفراندۆمەکەی هەرێمی کوردستان

  • VOA News

ڕێکس تیلەرسن وەزیری دەرەوەی ئەمەریکا ئەمڕۆ هەینی بەیانـنامەیەکی بڵاوکردەوە و تیایدا جەختی لە هەڵوێستی وڵاتەکەی کردەوە کە ڕیفراندۆمەکەی هەرێمی کوردستانی عێراق بە نا شەرعی دادەنێت و دانی‌پـیادانانێت.

ئەمەش دەقی بەیانـنامەکە:

ویلایەتە یەکگرتووەکانی ئەمەریکا دان‌نانێت بەو ڕیفراندۆمە یەک لایەنەی حکومەتی ھەرێمی کوردستان کە لە ڕۆژی دووشەممە ئەنجامدرا.

دەنگدان و ئەنجامەکەی شەرعیەتیان نیـیە، وە ئێمە بەردەوامین لە پشتیوانیکردنی عێراقێکی یەکگرتوو فیدراڵ و دیموکراسی و خۆشگوزەران.

ئێمە بەردەوامین لە نیگەرانیـیەکانمان سەبارەت بە ئاکامە نەرێنیـیەکانی کە شیانیان هەیە لە ئەنجامی ئەم ھەنگاوە یەک لایەنەیە بکەونەوە. بەر لە دەنگدانەکە, ئێمە لەگەڵ ھەردوو حکومەتی ھەرێمی کوردستان و حکومەتی ناوەندی لە بەغدا کارمان کرد بۆ گەیشتن بە چوارچێوەیەکی زیاتر بەسوود لە پـێناو بەدیهێنانی سەقامگیری و خۆشگوزەرانی بۆ خەڵکی ھەرێمی کوردستان. ئەم خواستانە لە کۆتاییدا ناتوانرێت بەدی‌بهێنرێن لە ڕێگەی کرداری یەک لایەنەی وەک ئەم ڕیفراندۆمە.

ئێمە داوادەکەین هێمنی ڕابگیرێت و کۆتایی‌بهێنرێت بە تاوانبارکردن و ھەڕەشەکردن لە یەکتر بەوەی ڕێوشوێن لە دژی یەکتر دەگرنەبەر. داوا لە کوردی عێراق دەکەین ڕێز لە ڕۆڵی دەستوری حکومەتی ناوەندی بگرن وە داوا لە حکومەتی ناوەندی دەکەین چیتر هەڕەشە نەکات و تەنانەت باسی شیانی بەکارھێنانی ھێزیش نەکات. ویلایەتە یەکگرتووەکانی ئەمەریکا داوا لە ھەموو لایەنەکان دەکات, بە دراوسێکانی عێراقیشەوە, کاری یەک لایەنە ئەنجام نەدەن و بەکارھێنانی ھێز ڕەتبکەنەوە.

شەڕی دژ بە داعش کۆتایی نەھاتووەو گرووپە توندڕەوەکان بەدوای ئەوەوەن ناسەقامگیری و ناتەبایی بقۆزنەوە. ئێمە ھانی ھاوشانە عێراقیەکانمان دەدەین بەردەوام بن لە تیشک‌خستنە سەر لەناوبردنی داعش.

داوا لە ھەموو لایەک دەکەین بەشداریەکی بنیادنەرانەیان هەبێت لە دیالۆگێک بۆ باشکردنی ئایندەی هەموو عێراقیـیەکان.

XS
SM
MD
LG