وەزیری بەرگری ئەمەریکا مارک ئێسپەر لە چاوپێکەوتنێکی تەلەفیزیۆنیدا وتی چین هێشتا زانیاری سەبارەت بە ڤایرۆسی کۆرۆنا دەشارێتەوە و ئاشکرای ناکات، هەروەها داواشی لە پەکین کرد زانیارییەکان ئاڵوگۆڕ بکات.
ئێسپەر لە چاوپێکەوتنێکیدا لەگەڵ کەناڵی فۆکس نیوز وتی " ئەگەر چینیەکان لە زووەوە ڕاستیەکانیان ئاشکرا بکردایە و زانیاری زیاتریان بدرکاندایە ئەوا ئێستا باشتر لەم ڤایرۆسە تێدەگەیشتین و باشتر مامەڵەمان لەگەڵدا دەکرد."
وتیشی " هەتاوەکو ئەمڕۆ دەیانبینین زانیاری دەشارنەوە، بۆیە پێم وایە دەبێت هەوڵی زیاتر بدەین بۆ فشارخستنە سەریان تاوەکو بەشدار بن لەگەڵماندا."
سەرچاوە/ ڕۆیتەرز