ئەڵمانیا لەژێر فشارێکی زۆری هاوپەیمانەکانی ئەوروپادایە تاوەکو دەستبەرداری ئەو سیاسەتە درێژخایەنەی بێت کە تیایدا چەک نادات بە ئۆکرانیا، ئەوەش لەپێناو یارمەتیدانی ئۆکرانیادا بۆ بەرگریکردن لە خۆی دژی ئەگەری هێرشی ڕوسیا.
ڕۆژی دووشەممە بەڕیتانیا موشەکی مەودا کورتی دژە تانکی ڕەوانەی ئۆکرانیا کرد، بەڵام خۆی بەدوورگرت لە ئاسمانی ئەڵمانیا. وەزیری بەرگری بەڕیتانیا بێن واڵاس بە یاسادانەرانی وڵاتەکەی وت پێدەچێت بە لەبەرچاوگرتنی زیادبوونی هێزەکانی ڕوسیا لەسەر سنوورەکانی ئۆکرانیا، یارمەتیە سەربازیی و ئاسایشیەکانی بەڕیتانیا بۆ ئۆکرانیا زیاتر ببێت.
واڵاس وتی " هۆکارێکی ڕاستەقینە هەیە بۆ ئەوەی نیگەران بین "، ئەوەش ئەوەیە ڕوسیا پلانی داگیرکردن دادەڕێژێت. ڕوسیا ڕەتی دەکاتەوە پلانی لەو جۆرەی هەبێت، بەڵام ڕۆژی چوارشەممە وەزیری دەرەوەی ئەمەریکا ئەنتۆنی بلینکن بەرلە کۆبوونەوەکەی لەگەڵ سەرۆکی ئۆکرانیا ڤۆلۆدیمێر زیلینسکیدا هۆشداریدا لەسەر ئەوەی " هەڕەشەکانی سەر ئۆکرانیا بێپێشینەن."
ئۆکرانیا نیگەران بووە لە ئەڵمانیا، ئەوەش بەهۆی ئەوەی ئەڵمانیا کەلوپەل و چەکی سەربازیی نادات بە ئۆکرانیا. مانگی ڕابردوو وەزیری بەرگری ئۆکرانیا ئۆلێسکی ڕێزنیکۆڤ وتی بەرلین مافی ڤیتۆی دژی ئەوە بەکارهێناوە ئۆکرانیا چەکی دژە فڕۆکەی بێفڕۆکەوان و سیستمی دژە نیشان شکێن لە ناتۆ بکڕێت. وتیشی " ئەمە شتێکی ناداپەروەرانەیە."
هۆکاری ئەوەی ئەڵمانیا چەک نادات بە ئۆکرانیا ئەوەیە ئەگەر ئەو کارە بکات ئەوا ڕوسیا لەوانەیە بە کارێکی وروژێنەر سەیری بکات و گرژییەکان زیاتر ببن.
ڕێزنیکۆڤ هۆشداریداوە لەسەر ئەوەی ترس لە ڕووبەڕووبوونەوەی پوتن لەکاتێکدا خۆت لە پێگەیەکی بەهێزدا بیت کارێکی هەڵەیە.
وتی " نەوروژاندنی ڕوسیا : ئەم ستراتیژییە سوودی نیە و سوودیشی نابێت."
ئۆکرانیا لەڕێی گرێبەستەکانیەوە چەکی لە بەڕیتانیا و ئەڵمانیا و لیتوانیا و فەڕەنسا و تورکیا کڕیوە.
مانگی ڕابردوو بەڕێوبەرایەتیەکەی سەرۆکی ئەمەریکا جۆو بایدن بڕی 200 ملیۆن دۆلاری لە بودجەی بەرگری وڵاتەکەی بۆ ئۆکرانیا تەرخان کرد، ڕۆژی چوارشەممەش بەرپرسانی ئەمەریکا وتیان کۆشکی سپی بیر لە ڕەوانەکردنی چەکی دیکە دەکاتەوە بۆ ئۆکرانیا تاوەکو کارەکان لەسەر سەرۆکی ڕوسیا ڤلادیمێر پوتن قورستر بکات ئەگەر بڕیاریدا هێرش بکاتە سەر ئۆکرانیا.
سەرچاوە/ دەنگی ئەمەریکا