سەرۆکی ویلایەتە یەکگرتووەکانی ئەمەریکا بەبۆنەی ڕۆژی جیهانی ژنانەوە پـیرۆزبایی لە ژنان کرد و داوا لە ئەمەریکایـیەکان کرد لەم ڕۆژە لەگەڵیدا ڕێز و پـێزانینی خۆیان بۆ ژنان دەرببڕن بۆ ئەو ڕۆڵە گرنگەی لە کۆمەڵگادا دەیگێڕن.
سەرۆک ترامپ ئەمڕۆ چوارشەممە لەسەر تویتەرکەی خۆی نووسیویەتی " لە ڕۆژی جیهانی ژناندا، لەگەڵمدا بن بۆ بەرزنرخاندنی ئەو ڕۆڵە گرنگەی ژنان لێرە لە ئەمەریکا و سەرانسەری جیهان دەیگێڕن."
پاشان نووسیویەتی ڕێزێکی ئێجگار زۆرم بۆ ژنان هەیە و بۆ ئەو خزمەتانەی پـێشکەشی پـێکهاتەی کۆمەڵگا و ئابوریەکەمانی دەکەن.
لە لایەکی دیکە ئەو گروپەی ڕێپـێوانەکەی مانگی یەکیان بۆ ژنان لە واشنتنی پایتەخت ڕێکخست، داوایان لە ژنان کرد ئەمڕۆ چوارشەممە بکەنە پشـوو و کارنەکەن.
گروپەکە ئەم چالاکیەیان ناودێرکرد بە A Day Without Women واتە ڕۆژێـک بەبێ ژنان. داوایان لە ژنان کرد لە ماڵەکانیان بمێننەوە و هەتا بۆیان دەکرێت پارە خەرج نەکەن، دەڵێن مەبەست لەم کارە نیشاندانی گرنگی ژنانە بەسەر ئابوریدا.
سەرۆک ترامپ لە تویتەرەکەی هیچی لەم بارەیەوە باس نەکرد.