دوو بەرپرسی ئەمەریکی نزیک لە سەرۆکی ئەمەریکا دانۆڵد ترامپەوە کە داوایان کردووە ناویان ئاشکرا نەکرێت وتیان لەم مانگەدا لەپەیوەندییەکی تەلەفونیدا لەگەڵ پاشای سعودیە سەلمان، سەرۆک ترامپ داوای کردووە سعودیە و هاوبەشە عەرەبەکانی بەخێرایی کۆتایی بەو ناکۆکییە بهێنن کە بۆ ماوەی ساڵێکە هەیانە لەگەڵ قەتەڕدا و بۆتە هۆی دابەشبوونی هاوپەیمانەکانی ئەمەریکا لە ناوچەکەدا.
دوو بەرپرسەکە وتیان سەرۆک ترامپ دەیەوێت ناکۆکییەکان کۆتایی پێبهێنێت لەپێناو ئەوەی وڵاتانی کەنداو جارێکی دیکە یەکبگرنەوە و لە ڕووبەڕووبونەوەی ئێراندا یەک بن.
یەکێک لە بەرپرسەکان وتی لە پەیوەندییەکەی نێوان سەرۆک ترامپ و پاشا سەلماندا، سەرۆک ترامپ بە توندی قسەی کردووە، بەڵام ئاماژەی بە کاردانەوەی پاشای سعودیە نەدا.
بەرپرسەکە وتی " سەرۆک هەمیشە سەنگی خستۆتە سەر ئێران و بەرنامە ناوەکیی و موشەکییەکەی کە هەڕەشەیە بۆ سەر هەموو کەنداو و ئیسڕائیلیش. هەروەها جەختی لەوە کردەوە کە دوژمنایەتی نێوان سعودیە و ئیماڕات لەگەڵ قەتەڕدا هیچ مانایەکی نیە."
سەرچاوە/ ڕۆیتەرز