دوکان و بازاڕەکانی سعودیە دەستیان کرد بە لابردنی بەرهەمە تورکیەکان، ئەمەش دوای ئەوەی سعودیە داوای کرد بەرهەم و شتومەکی تورکی بایکۆت بکرێت.
سعودیە و تورکیا هەمیشە ڕکابەری یەکتریان کردووە لەسەر ڕابەرایەتیکردنی جیهانی ئیسلامی، بەڵام دوای کوژرانی ڕۆژنامەنووسی سعودیە جەمال خاشقچی ململانێکانیان لە ناوچەکەدا زیادیکرد.
ئەو تورکانەی کە کەلوپەل و بەرهەمی تورکی ڕەوانەی سعودیە دەکەن لەمدواییانەدا سکاڵای ئەوە دەکەن پارەکانیان لە گومرگی سعودیە دوادەکەوێت، لە سەرەتای ئەم مانگەدا بەڕێوبەری ژووری بازرگانی سعودیە داوای کرد " هەموو کەلوپەل و بەرهەمە تورکییەکان بایکۆت بکرێن" جەختی لەوە کردەوە ئەوە " بەرپرسیارێتی هەموو هاوڵاتیەکی سعودی و بازرگان و بەکارهێنەرە کە بایکۆتی شتومەکی تورکی بکات، ئەوەش وەکو وەڵامێک بۆ بەردەوامی دوژمنکارییەکانی حکومەتی تورکیا بۆ سەر ڕابەر و وڵات و هاوڵاتیانمان."
دوای ئەم داوایە، بازاڕە گەورەکانی سعودیە لەوانەش بازاڕی عەبدوڵا عەثیم و تەمیمی و پاندا ڕایانگەیاند چیتر هیچ شتێک هەناردەی تورکیا ناکەن و شتومەکی تورکیش بایکۆت دەکەن.
بازاڕی عەبدوڵا عەثیم لە بەیاننامەیەکدا لە تویتەر دەڵێت " بڕیارەکەمان هاوکاتە لەگەڵ ئەم هەڵمەتەی دەستپێکراوە بۆ بایکۆتکردن، حکومەت و ڕابەر و ئاسایشمان هێڵی سوورن."
سەرچاوە/ فرانس پرێس