وەزارەتی دەرەوەی ڕووسیا وتی بانگهێشتی باڵیۆزی ئەمەریکا جۆن سۆلیڤانی کردووە تاوەکو پێی بڵێت لێدوانەکەی سەرۆکی ئەمەریکا جۆو بایدن سەبارەت بەوەی پوتن " تاوانباری جەنگە " پەیوەندییەکانی نێوان دوو وڵاتەکەی خستۆتە سەر لێواری ڕووخانەوە.
هەفتەی ڕابردوو سەرۆکی ئەمەریکا جۆو بایدن وتی پوتن " تاوانباری جەنگە " لەسەر ئەوەی هەزاران سەربازی ڕەوانەی ناو ئۆکرانیا کردووە.
وەزارەتی دەرەوەی ڕووسیا لە بەیاننامەیەکدا وتی " ئەو جۆرە قسانە لە سەرۆکی ئەمەریکاوە قسەیەک نین دەوڵەتمەدارێک بەو پلە بەرزەوە بیکات، پەیوەندییەکانی نێوان ڕووسیا و ئەمەریکاشی خستە سەر لێواری پچڕانەوە."
لە ماوەی ڕابردوودا کرێملن وتی ئەو جۆرە لێدوانانە " سوکایەتییەکی تایبەتییە " دژی پوتن.
وەزارەتەکە بە سۆلیڤانیشی وتووە کردەوە دوژمنکارییەکان دژی ڕووسیا " ڕووبەڕووی وەڵامێکی توند و یەکلاکەرەوە " دەبنەوە.
وەزارەتی دەرەوەی ئەمەریکا بانگهێشتکردنی باڵیۆزی ئەمەریکای لەلایەن ڕووسیاوە پشتڕاست نەکردەوە، بەڵام جێگری وەزیری دەرەوەی ئەمەریکا ویندی شێرمان لە چاوپێکەوتنێکدا لەگەڵ ئێم ئێس ئێن بی سیدا وتی بەیاننامەکەی ڕووسیا " پیشانی دەدات سەرۆکی پوتن چەند نائومێد بووە."
لە 24 ی مانگی دوودا ڕووسیا هەزاران سەربازی ڕەوانەی ناو ئۆکرانیا کرد و داگیرکارییەکەی بە " ئۆپەراسیۆنێکی سەربازیی تایبەت " ناودێر کرد، وتیشی مەبەست لە ئۆپەراسیۆنەکەی لەناوبردنی نەتەوە پەرستە مەترسیدارەکانی ناو ئۆکرانیا و داماڵینی توانا سەربازییەکانی ئۆکرانیایە.
هێزەکانی ئۆکرانیا ڕووبەڕووی هێزەکانی ڕووسیا بوونەتەوە و ڕۆژئاواش سزای ئابووری توندی بەسەر ڕووسیادا سەپاندووە، ئەمەش لە هەوڵێکدا بۆ ناچارکردنی ڕووسیا تاوەکو هێزەکانی لەناو ئۆکرانیا بکشێنێتەوە.
سەرچاوە/ ڕۆیتەرز
ڕووسیا: پەیوەندییەکانی نێوان مۆسکۆ و ئەمەریکا نزیکن لە ڕووخان
