Accessibility links

لە ئەنجامی پێکدادانێکدا لە پاکستان چوار کەس کوژران


بەرپرسانی پاکستان ڕایانگەیاند لە ئەنجامی تەقە کردنێکدا لە شاری کوێتای باشووری ڕۆژئاوای پاکستان دوو پۆلیس و دوو چەکدار کوژران.

تەقەکردنەکە ئێوارەی ڕۆژی یەکشەممە ڕوویداوە لەنزیک کاتی بەربانگ، لەکاتێکدا دوو چەکدار بە ماتۆڕەوە تەقەیان لە دوو پۆلیسی هاتووچۆ کردووە و کوشتوویانن.

دوای ئەوەی گوێیان لە تەقەکە بووە، سەربازەکان بەرەو ئەو ناوچەیە ڕۆشتوون.

بەرپرسێکی پۆلیس عەبدول ڕەزاق شیمان بە فرانس پرێسی وت " سەربازەکان بە هەمان شێوە وەڵامی چەکدارەکانیان داوەتەوە و یەکسەر کوشتوویانن."

وتەبێژەکە وتی چەکدارێکی دیکە بە ماتۆڕەوە لە میانەی پێکدادانەکەدا برینداربووە بەڵام توانیویەتی هەڵبێت.

وەزیری ناوخۆی هەرێمی بلوشستان عەلی بەلوش تەقەکردنەکەی پشت ڕاستکردەوە و خەڵاتێکی بە بڕی یەک ملیۆن ڕوپی کە دەکاتە 8644 دۆلار داناوە بۆ هەر کەسێک کە زانیاری لەسەر چەکدارەکان پێشکەش دەکات.

هیچ لایەنێک بەرپرسیارێتی هێرشەکەی ڕانەگەیاندووە.

بلوشستان دەکەوێتە سەر سنووری ئێران و ئەفغانستان و دەوڵەمەندە بە نەوت و گاز بەڵام ڕووبەڕووی هێرشە تیرۆریستیەکان و توندڕەوی مەزهەبی نێوان سووننە و شیعە بۆتەوە.

بلوشستان بە گەورەترین چوار هەرێمەکەی پاکستان دادەنرێت، بەڵام دانیشتوانەکانی کە ژمارەیان نزیکەی حەوت ملیۆن کەسە دەڵێن بژێوی ژیانیان باش نیە لەچاو ئەو هەموو گاز و نەوتەی کە هەرێمەکە هەیەتی.

سەرچاوە/ فرانس پرێس

XS
SM
MD
LG