شەمەندەفەرێـک ئەمڕۆ پـێـنجشەممە لە وێستگەی شەمەندەفەری ناوچەی هۆبۆکێن لە ویلایەتی نیوجێرزی لە هێڵەکەی دەرچووە و چووەتە ناو وێستگەکە و لە ئاکامدا کەسێـک گیانی لەدەسـتداوە و 114 کەسی دیکە برینداربوون.
کرێس کرستی فەرمانڕەوای ویلایەتی نیوجێرزی گوتی تەنها لە ژنێـکی داوە و کوشتویەتی و ئەوانی دیکە لە ناو شەمەندەفەرەکە برینداربوون. گوتیشی بە گشتی برینەکانیان قورس نیـیە هەتا مەترسی هەبێت کەسی دیکە ژیانی لە مەترسیدابێت.
بەپـێی لێکۆڵینەوە سەرەتایـیەکان شەمەندەفەرەکە بە خێرایـیەکی زۆر هاتووە و هەتا ئێسـتا نازانرێت بۆچی. دەشڵێن شۆفێرەکەی بە قورسی برینداربووە. وێستگەکەش زیانێـکی مادی زۆری بەرکەوتووە و کار تیایدا ڕاگیراوە. کرس کرستی لەم بارەیەوە دەڵێت هەتا شوێنە سەرەکیـیەکان چاک نەکرێنەوە و دڵنیا نەبن لەوەی کارکردن تیایدا سەلامەتە وێستگەکە ناکەنەوە.
خانم نانسی سنایدەر گوتەبێژی بەڕێوەبەرایەتی هاتوچۆ گوتی شەمەنەدەفەرەکە لە ناوچەی سپـرینگ ڤالی نیویۆرکەوە هاتبوو.