ناتۆ: جموجۆڵی هێزەکانی ڕووسیا بە تەنها پشتڕاستکردنەوەی کشانەوەی ئەو هێزانە نیە

سکرتێری گشتی هاوپەیمانێتی ناتۆ یانس ستۆڵتنبێرگ دووبارە داوای لە ڕووسیا کرد بیسەلمێنێت کە هێزەکانی دەکشێنێتەوە، وتی سەرباز و تانکەکان زۆر جار دەجوڵێن.

ستۆڵتنبێرگ پێش کۆبوونەوەکەی وەزیرانی بەرگری هاوپەیمانێتی ناتۆ لە بڕۆکسل بە ڕۆژنامەنووسانی وت " هێشتا دەبێت بزانین ڕووسیا دەکشێتەوە یاخود نا، ئەوەی دەیبینین ئەوەیە ژمارەی هێزەکانیان زیادکردووە، هێزی زیاتریش بەڕێوەن."

وتیشی " ئەگەر بەڕاستی دەست بکەن بە کشانەوەی هێزەکان، ئەوە شتێک دەبێت ئێمە پێشوازی لێدەکەین، ئەوان هەمیشە هێزەکانیان جوڵاندووە، تەنها بینینی جموجۆڵی سەرباز و تانکەکان پشتڕاستکردنەوەی کشانەوەی ئەو هێزانە نیە."

سەرچاوە/ ڕۆیتەرز