Accessibility links

جێگری سەرۆکی ئەمەریکا تاجە گوڵینە لە گۆڕستانی ئەرلنگتنی نیشتمانی دادەنێت


جێگری سەرۆکی ئەمەریکا سەردانی گۆڕستانی ئەرلنگتنی نیشتمانی کرد بە بۆنەی ڕۆژی یادەوەری Memorial Day کە ڕۆژێکە بۆ یادکردنەوەی ئەو سەربازانەی گیانی خۆیان بەخت کرد لە پـێناو وڵاتەکە و ئەو بەهایانەی ئەمەریکایـیەکان بڕوایان پـێی هەیە.

مایک پـێنس ئەمڕۆ دووشەممە تاجە گوڵینەی دانا لەسەر گۆڕی سمبولی سەربازی ون لە گۆڕستانی ئەرلنگتنی نیشتمانی نزک واشنتنی پایتەخت و گوتی بۆ ئەوان" هەموو ڕۆژێک ڕۆژی یادەوەریـیە."

پاشان ڕووی دەمی کردە کەسوکاری ئەو سەربازانەی گیانی خۆیان بەخت کردووە و گوتی "ئامادەبوونتان جێی شەرەفە بۆم"

جگە لە جێگری سەرۆکی ئەمەریکا ژمارەیەک کاربەدەستی دیکەی باڵا ئامادەی مەراسیمەکە بوون، لەوانە پاتریک شاناهان وەزیری بەرگری بە وەکالەت و جەنەڕاڵ جۆزێف دەنفۆرد سەرۆکی ئەرکانی لەشکری ئەمەریکا.

سەرۆک ترامپ و خانمی یەکەمی ئەمەریکا مەڵانیا ترامپ پـێنجشەممەی ڕابردوو سەردانی گۆڕستانی ئەرلنگتنیان کرد و ئاڵای ئەمەریکایان خستە سەر چەند گۆڕێک، ئەمەش نەریتێکە بۆ دەیان ساڵە پەیڕەودەکرێت.

لە ئێستادا سەرۆک ترامپ بە سەردانێک لە ژاپـۆنە و لە بەرنامەیدایە لەوێ لەسەر کەشتیـیەکی جەنگی ئەمەریکا وتارێک بۆ سەربازانی ئەمەریکایی پـێشکەش بکات.

جێی ئاماژەیە ئەم بۆنەیە وەها دانراوە بکەوێتە دوایـین ڕۆژی دووشەممەی مانگی پـێنجی هەموو ساڵێک. بۆ ئەمساڵی 2019 ، ئەمڕۆ ڕێـکەوتی 27 ی مانگ دەکات. ئەمەریکایـیەکان لەم ڕۆژەدا لە سەرانسەری وڵاتەکە چالاکی جۆراوجۆر ئەنجام دەدەن، لەوانە ئاڵای ئەمەریکا لەسەر گۆڕی سەربازە گیان فیداکان دەچەقێنرێت.

XS
SM
MD
LG