Accessibility links

پەرلەمانی هەرێمی کوردستان متمانەی بەخشی بە مەسرور بارزانی بۆ سەرۆکی حکومەت


مەسرور بارزانی

کەمێک لەمەوبەر پەرلەرمانی هەرێمی کوردستان بە زۆرینەی دەنگی پەرلەمانتارانی متمانەی دا بە کاندیدی پارتی دیموکراتی کوردستان (مەسرور بارزانی) بۆ سەرۆکی حکومەتی هەرێم.

کۆبونەوەی پەرلەمانی هەرێمی کوردستان بڕگەی دووەمی کۆبونەوەکەی دوێنێ پەرلەمان بوو کە سەرۆکی هەرێم سوێندی یاسایی خوارد و دانیشتنەکە بۆ ئەمڕۆ سێ شەممە بەکراوەیی بەجێ هێڵدرا، لەکۆبونەوەکەدا بەدەنگی 87 پەرلەمانتار لەکۆی 97 پەرلەمانتاری ئامادەبوو متمانە بەخشرایە کاندیدی سەرۆکی حکومەتی هەرێمی کوردستان.

پێشتر و ڕۆژی 3/12 لەکۆبونەوەی مەکتەبی سیاسی پارتی دیموکراتی کوردستاندا، ئەو حیزبە نێچیرڤان بارزانی بۆ سەرۆکی هەرێم و مەسرور بارزانی وەک کاندیدی خۆی بۆ پۆستی سەرۆکی حکومەت دیاریکرد.

مەسرور بارزانی کوڕە گەورەی (مەسعود بارزانی )سەرۆکی پێشووی هەرێمی کوردستان و سەرۆکی پارتی دیموکراتی کوردستانە، کە گەورەترین پارتی هەرێمەکەیە بەپێی ڕێژەی کورسیەکانی لەناو پەرلەمانی هەرێمی کوردستان و پەرلەمانی عیراق.

بارزانی جگە لەپۆستە حیزبیەکەی ئەندامی مەکتەبی سیاسی پارتی دیموکراتی کوردستان هاوکات لە 8/7/2012 ە وە پاش پەسەندکردنی یاسای ئەنجومەنی ئاسایشی هەرێمی کوردستان لە پەرلەمانی کوردستان بۆتە ڕاوێژکاری ئەنجومەنی ئاسایشی هەرێم، هەروەها سەرۆکی فەخری زانکۆی ئەمریکیە لە دهۆک.

پارتی دیموکراتی کوردستان لە هەڵبژاردنە پەرلەمانیەکەی هەرێمی کوردستان لە 30/9ی ساڵی ڕابردو زۆرترین ڕێژەی دەنگەکانی هێنا، توانی 45 کورسی لە کۆی 111کورسیەکەی پەرلەمانی هەرێمەکە بەدەست بهێنێت.

بەپێی یاسای ژمارە(1) ی ساڵی 2005، یاسای سەرۆکایەتی هەرێم کە هەمواری سێیەمی لەم خولەی پەرلەمان بۆ کراوە، یەکێک لەدەسەڵاتەکانی سەرۆکی هەرێم ڕاسپاردنی سەرۆکی متمانە پێدراوی حکومەتە بە پێکهێنانی کابینەکەی لەماوەی یەک مانگدا، وا چاوەڕوان دەکرێت لەماوەی چەند ڕۆژی ئایندەدا سەرۆکی هەرێم سەرۆکی متمانە پێدراوی حکومەت ڕابسپێرێت.

XS
SM
MD
LG