Accessibility links

وەزیری بەرگری ئیسڕائیل دەڵێت ئێران کارگەکانی سوریا بۆ بەرهەمهێنانی چەک بەکاردەهێنێت


وەزیری بەرگری ئیسڕائیل بێنی گانتز

وەزیری بەرگری ئیسڕائیل بێنی گانتز دەڵێت ئێران زیاتر لە 10 کارگەی سەربازیی لە سوریا بەکارهێناوە بۆ بەرهەمهێنانی موشەکی پێشکەوتوو و چەک بۆ بریکارەکانی.

ماوەی چەند ساڵێکە ئیسڕائیل بەردەوام بووە لە هێرش کردنە سەر " ئامانجەکانی سەر بە ئێران لە سوریادا."

تاوەکو ئێستا ئێران و سوریا لێدوانییان نەداوە، بەڵام لە ڕابردوودا دیمەشق ڕەتی کردۆتەوە لێدوان لەسەر ئەو جۆرە تۆمەتانە بدات و تارانیش ڕەتی کردۆتەوە چەک لە سەرانسەری ڕۆژهەڵاتی ناوەڕاستدا بەرهەم بهێنێت.

گانتز لە میانەی کۆنفرانسێکی ڕۆژنامەوانیدا لە نیویۆرک نەخشەیەکی پێشکەش کرد و لە نەخشەکەدا شوێنە سەربازییەکانی ناوەندی دیتود ئیت دی ڕیسێرچز ساینتیفیکسی پیشاندا، ناوەندەکە دەزگایەکی حکومەتی سوریایە و دەستی هەیە لە بەرهەمهێنانی موشەک و چەکدا بۆ ئێران.

گانتز گوتی " ئێران ناوەندەکەی گۆڕیوە بۆ کارگەی بەرهەمهێنانی چەک و موشەکی مەودا ناوەند و درێژ، ئەو موشەک و چەکانەش دەدرێن بە حیزبوڵا و بریکارەکانی ئێران. بووەتە بەرەیەکی دیکەی ئێران، کارگەیەک بۆ چەکی پێشکەوتوو و ستراتیژی."

سەرچاوە دیبلۆماتییەکانی ناوچەکە و سەرچاوە هەواڵگرییەکان بە ڕۆیتەرزیان وت ئەو هێرشە ئاسمانییانەی ئەمدواییانە کە خراونەتە پاڵ ئیسڕائیل، فڕۆکەخانەکانی سوریایان کردۆتە ئامانج تاوەکو تواناکانی ئێران بۆ گواستنەوەی چەکەکانی بۆ سوریا و لوبنان لەڕێی ئاسمانەوە تێک بدات.

هێرشە ئاسمانییەکانی ئیسڕائیل چەند جارێک ناوچەی مەسیافییان کردۆتە ئامانج، گانتز دەڵێت ئەو ناوچەیە کارگەیەکی ژێرزەمینی دروستکردنی چەکی لێییە و هەڕەشەیە بۆ سەر ئیسڕائیل و ناوچەکە.

گوتی " مەسیاف بەدیاریکراوی بەکارهێندراوە بۆ بەرهەمهێنانی موشەکی پێشکەوتوو."

گوتیشی ئێران کاردەکات بۆ بونیادنانی پیشەسازی دروستکردنی موشەک و چەک لە لوبنان و یەمەندا.

گوتی " ئەگەر ئەمە لە ماوەی 10 ساڵدا ڕانەگیرێت، ئەوا پیشەسازی پێشکەوتووی ئێران لە سەرانسەری ناوچەکەدا دەردەکەون و چەک بەرهەم دەهێنن و تیرۆر بڵاودەکەنەوە."

سەرچاوە/ ڕۆیتەرز

XS
SM
MD
LG