ڕێبەرێکی شیعەی عێراق داوای لە ئێران کردووە دەستوەرنەداتە کاروباری وڵاتەکەی، ئەمەش هاوکاتی لایەنە عێراقیـیەکان تاووتوێی پـرسی پـێکهێنانی حکومەتی نوێی وڵاتەکەیان دەکەن.
ئۆفیسی موقتەدا سەدر لەسەر فەیسبوکی تایبەتی خۆی نووسراوێکی بڵاوکردووەتەوە و تیایدا ئاماژە بەوە دەکرێت هەندێک لە سیاسیـیەکان گوتویانە بەبێ ڕەزامەندی ئێران و ئەمەریکا حکومەتی عێراق پـێک ناهێنرێت.
موقتەدا سەدر لەم بارەیەوە گوتویەتی "ئێران وڵاتێکی دراوسێـیە و لە خەمی بەرژەوەندیـیەکانیەتی، هیوادارین دەستوەرنەداتە کاروباری عێراق وەک چۆن ڕەتی دەکەینەوە کەس دەستوەربداتە کاروبارمان. سەبارەت بە ئەمەریکاش، ئەو وڵاتێکی داگیرکەرە بە هیچ شێوەیەک ڕێگە نادەین دەستوەربدات."
بەشێک لە بەرپـرسانی حزبی و سیاسەتمەداران لە عێراق پـێیانوایە ئەمەریکا و ئێران و زۆربەی وڵاتانی ناوچەکە کاریگەریـیان بەسەر هەوڵەکان بۆ پـێکهێنانی حکومەتی نوێی عێراق هەیە، لەوانە عیزەت شابەندەر سیاسەتمەداری دێرینی عێراق لە وتووێژێکدا لەگەڵ بەشی کوردی دەنگی ئەمەریکا ئاماژەی بەو ڕەوشە کرد.