سەرۆکی ئێران حەسەن ڕۆحانی وتی وڵاتەکەی ئامادەیە لەگەڵ دراوسێکانیدا کاربکات بۆ خستنەوەی ئاشتی لە ڕۆژهەڵاتی ناوەڕاستدا و بەرەنگاربوونەوەی ئەمەریکا و ئیسڕائیل، ئەمەش لە نوێترین هەوڵەکانی ڕۆحانیدا بۆ لاوازکردنی پەیوەندییەکانی نێوان سعودیە و ئەمەریکا.
جێی ئاماژەیە چەند ساڵێکی زۆرە سعودیە و ئێران بە وەکالەت لە جەنگدان و یارمەتی لایەنە جیاوازەکانی جەنگی سوریا و یەمەن دەدەن.
بەڵام دوای ئەوەی سەرۆکی ئەمەریکا دانۆڵد ترامپ لە ڕێکەوتنە ناوەکییەکەی ئێران کشایەوە و سزاکانی سەپاندەوە بەسەر ئێراندا، فشارەکانی سەر تاران زیاتر بوون، سعودیەش پێشوازی لەو هەنگاوەی ئەمەریکا کرد.
ڕۆحانی لە وتارێکیدا لە هەرێمی هەرمزجان وتی " ئێران ئامادەیە لەگەڵ هەموو وڵاتانی ناوچەکەدا کاربکات بۆ پاراستنی ئاسایشی ڕۆژهەڵاتی ناوەڕاست، دەمانەوێت پەیوەندییەکی برایانە دابمەزرێنین لەگەڵ هەموو وڵاتانی ناوچەکەدا. ئێران هەرگیز دەستپێشخەر نەبووە لە هیچ دوژمنکارییەک لە ناوچەکەدا."
وتیشی " ئەو وڵاتانەی ناوچەکە کە پێیان وایە ئیسڕائیل و ئەمەریکا دەتوانن ئاشتی بخەنەوە لە ناوچەکەدا هەڵەن. پێویستە لەسەر ئێمەی موسوڵمان گرەنتی پارێزراوی ناوچەکە بدەین."
جێی ئاماژەیە ئێران سعودیە و ئیماڕات تۆمەتبار دەکات بە تۆمەتی پشتیوانیکردن لەو گروپە سوننییانەی کە هێرش دەکەنە سەر هێزەکانی ئێران، بەو هێرشەی ڕۆژی چوارشەممەشەوە لە هەرێمێکی باشووری ڕۆژهەڵاتی ئێران لەسەر سنووری پاکستان.
سعودیە و ئیماڕات و پاکستان ڕەتی دەکەنەوە پشتیوانی لە توندڕەوان بکەن. وەزیری دەرەوەی ئێران ڕۆژی یەکشەممە بانگهێشتی نوێنەری پاکستانی کرد لە تاران بەمەبەستی ناڕەزایی دەربڕین لەسەر هێرشەکە.
سەرچاوە/ ڕۆیتەرز