بەرپرسی کاروباری سیاسەتی دەرەوەی یەکێتی ئەوروپا جۆسێپ بۆڕێڵ سەرکۆنەی پشتیوانییەکانی ئێرانی کرد بۆ ڕووسیا لە جەنگەکەیدا لە ئۆکرانیا و هەروەها سەرکۆنەی سەرکوتکارییەکانی دەسەڵاتدارانی ئێرانی کرد دژی خۆپیشاندانەکان، بەڵام وتی یەکێتی ئەوروپا بەردەوام دەبێت لە کارکردن لەگەڵ ئێراندا بۆ دووبارە زیندووکردنەوەی ڕێککەوتنە ئەتۆمییەکەی ساڵی 2015.
بۆڕێڵ وتی " لە نێوەندی خراپبوونی پەیوەندییەکانی نێوان یەکێتی ئەوروپا و ئێراندا کۆبوونەوەیەکی پێویست لەگەڵ وەزیری دەرەوەی ئێران حوسەین ئەمیرعەبدوڵاهیان لە ئوردن بەڕێوەچوو."
بۆڕێڵ وتیشی " جەختمان لە پێویستیی ئەوە کردۆتەوە دەستبەجێ ئێران پشتیوانییە سەربازییەکانی بۆ ڕووسیا و سەرکوتکارییەکەی لە ناوخۆی ئێراندا ڕابگرێت. ڕێککەوتین لەسەر ئەوەی دەبێت پەیوەندییەکانمان بە کراوەیی بهێڵینەوە و ڕێککەوتنە ئەتۆمییەکەش بەپێی گفتوگۆکانی ڤییەنا زیندوو بکەینەوە."
لێدوانەکانی بۆڕێڵ پێش کۆنفرانسی وڵاتانی ناوچەکە دێت لە ئوردن کە هەریەک لە فەڕەنسا و عێراق ڕێکییان خستووە و سعودیە و ئێرانیش بەشداریی تێدا دەکەن، ئامانج لە کۆنفرانسەکەش گفتوگۆکردنە لەسەر کێشەکانی ناوچەکە.
سەرۆکی فەڕەنسا ئیمانوێل ماکرۆن ئامادەی کۆنفرانسەکە دەبێت، لە مانگی 8 ی ساڵی 2021 دا کۆنفرانسێکی هاوشێوە لە بەغداد بەڕێوەچوو و ماکرۆن بە هەمان شێوە بەشداری تیادا کرد، بەڵام وەکو دەرخستنی پشتیوانی بوو بۆ عێراق.
بەرپرسێکی سەرۆکایەتی فەڕەنسا وتی " بیرۆکەکە ئەوەیە ئەو ڕێگایە ببینین کە دەتوانین بیگرینەبەر بۆ ئەوەی بۆچوونی لایەنەکان لە یەکتر نزیکتر بکەینەوە. بیرۆکەی کۆنفرانسەکەی بەغداد کۆکردنەوەی لایەنەکانی ناوچەکە بوو بۆ گۆڕینەوەی بۆچوونەکانیان و بزانرێت چۆن لە ڕووی سیاسییەوە بەرەوپێشەوە بڕۆن."
هەریەک لە وەزیرانی دەرەوەی سعودیە و ئێران بەشداری کۆنفرانسەکە دەکەن، کە لە ساڵی 2016 دا پەیوەندییەکانی نێوانیان تێکچوو.
سەرچاوە/ ڕۆیتەرز
بۆڕێڵ: یەکێتی ئەوروپا و ئێران بەردەوام دەبن لە کارکردن لەسەر ڕێککەوتنە ئەتۆمییەکە
