سەرۆکی کۆمسیۆنی ئەوروپا ئۆرسولا ڤۆن دێر لین وتی بەرەوپێشچوونێک هەیە لە گفتوگۆکاندا لەگەڵ سەرۆک وەزیری هەنگاریا ڤیکتۆر ئۆرباندا سەبارەت بە قەدەغەکردنی هاوردەکردنی نەوتی ڕووسیا لەلایەن یەکێتییەکەوە.
ڤۆن دێر لین وتی " گفتوگۆکانی ئەم ئێوارەیە لەگەڵ سەرۆک وەزیر ڤیکتۆر ئۆرباندا یارمەتیدەر بوو لە ڕوونکردنەوەی هەندێک کێشەی پەیوەست بە سزاکان و ئاسایشی وزەدا."
وتی " بەرەوپێشچووین، بەڵام کاری زیاتر پێویستە."
ڤۆن دێر لین وتی پەیوەندییەکی ڤیدیۆیی لەگەڵ وڵاتانی دیکەی ناوچەکەدا ئەنجام دەدات تاوەکو هاریکارییەکانی نێوان وڵاتەکانی ناوچەکە لەسەر ژێرخانی نەوت بەهێز بکات.
ڕۆژی چوارشەممەی ڕابردوو کۆمسیۆنی ئەوروپا پێشنیاری سەپاندنی قورسترین سزای کرد بەسەر ڕووسیادا، لەوانەش قەدەغەکردنی هاوردەکردنی نەوتی ڕووسیا. بەڵام هەندێک لە وڵاتانی یەکێتییەکە نیگەرانن سەبارەت بە قەدەغەکردنەکە، ئەوەش کۆسپی لەبەردەم پەسەندکردنی قەدەغەکردنەکەدا دروست کردووە.
هەفتەی ڕابردوو سەرۆک وەزیری هەنگاری ڤیکتۆر ئۆربان لە نامەیەکدا بۆ ڤۆن دێر لین وتی سزا نوێیەکانی یەکێتییەکە دژی ڕووسیا یەکگرتوویی ئەوروپا دەخاتە مەترسییەوە و پەسەندکردنیشی شکستێکی مێژوویی دەبێت.
سەرچاوە/ ڕۆیتەرز
ڤۆن دێر لین دەڵێت بەرەوپێشچوونێک کراوە لە گفتوگۆکاندا لەگەڵ هەنگاریا سەبارەت بە قەدەغەکردنی نەوتی ڕووسیا
