Accessibility links

سەرۆکی ئەفغانستان بەرەو قەتەڕ دەڕوات


سەرۆکی ئەفغانستان ئەشرەف غەنی

بەرپرسانی ئەفغانی دەڵێن سەرۆکی ئەفغانستان ئەشرەف غەنی بەرەو قەتەڕ بەڕێدەکەوێت بەمەبەستی کۆبوونەوە لەگەڵ ڕابەرانی قەتەڕدا، بەڵام لەگەڵ بەرپرسانی بزوتنەوەی تاڵیباندا کۆنابێتەوە کە لە ئێستادا دانوستانەکانی ئاشتی نێوان ئەفغانستان و تاڵیبان لە دەوحەی قەتەڕ بەردەوامن.

مەبەست لە دانوستانەکانی ئاشتی نێوان ئەفغانستان و تاڵیبان کە مانگی ڕابردوو دەستی پێکرد کەمکردنەوەی توندوتیژییەکانە لە وڵاتەکەدا و هەروەها گەیشتنە بە ڕێکەوتنێک بۆ دابەشکردنی دەسەڵات لە وڵاتەکەدا.

بەڵام لەگەڵ ئەوەشدا، توندوتیژییەکان لە ئەفغانستان تاوەکو ئێستا کەم نەبوونەتەوە، ئەمەش سەرەڕای ئەوەی نوێنەرانی ئەفغانستان و تاڵیبان بۆ یەکەمین جار ڕاستەوخۆ لە دانوستاندان.

یاریدەدەرێکی نزیکی ئەشرەف غەنی بە ڕۆیتەرزی وت غەنی و تیمەکەی سەرەتا سەردانی کوەیت دەکەن و دواتر ڕۆژی دووشەممە بەرەو قەتەڕ بەڕێدەکەون.

وتیشی " وابڕیارە کۆبوونەوە بکرێت بۆ تاوتوێکردنی هەوڵەکان بۆ پتەوکردنی پەیوەندییەکانی نێوان ئەفغانستان و قەتەڕ و هاریکاری نێوانیان لە بوارە جیاجیاکاندا." ئاماژەشی بەوەدا غەنی چاوی بە نوێنەرانی ئەفغانستانیش دەکەوێت کە دانوستان لەگەڵ تاڵیباندا دەکەن.

دیبلۆماتکارێکی ڕۆژئاوا کە چاودێری پڕۆسەی ئاشتی دەکات وتی " بەڵام ڕوون و ئاشکرایە کە غەنی لەگەڵ بەرپرسانی تاڵیباندا کۆنابێتەوە چونکە توندوتیژییەکان وەکو خۆیان ماونەتەوە و تاڵیبان بەردەوامە لە کوشتنی هاوڵاتیانی مەدەنی بێتاوان."

سەرچاوە/ ڕۆیتەرز

XS
SM
MD
LG