هێزه‌کانی میلیشـیای تالیبان له ناو پاکسـتاندا ده‌سـتیان کردووه به کشـانه‌وه له هه‌رێمی باکوری ڕۆژئاوای وڵات که هه‌فته‌ی پـێشـوو چووبوونه ناوی.
ده‌سه‌ڵاتدارێـکی باڵای ئه‌و ناوچه‌یه ڕایگه‌یاند هێزه‌کانی تالیبان خه‌ریکی کشانه‌وه‌ن له ناوچه‌ی بونار به‌ره‌و بنکه به‌هێزه‌کانیان له ناوچه‌ی سـوات ڤالی ئه‌و نزیکانه.
هاوکات ئه‌مڕۆ فه‌رمانده‌ی باڵای سـوپای پاکسـتان جه‌نه‌ڕاڵ ئه‌شفه‌ق کیانی کۆبوونه‌وه‌یه‌کی نایاسایی له‌گه‌ڵ فه‌رمانده له‌شـکریـیه‌کانی ئه‌و هه‌رێمه‌دا سـازدا بۆ وتووێـژی هه‌ڵـمه‌ته له‌شـکریـیه‌کان له ناوچه‌کانی به‌نه‌ر سـوات، دواتر جه‌نه‌ڕاڵ کیانی به‌یانـنامه‌یه‌کی بڵاوکرده‌وه و تیایدا ڕایگه‌یاند که سـوپا ڕێـگا به میلیشـیاکان نادات هه‌لومه‌رج به‌سه‌ر حکومه‌تدا بـسه‌پـێنن یان شـێوازی ژیانیان بسه‌پـێنن به‌سه‌ر کۆمه‌ڵـگای پاکسـتاندا.
شـایانی باسه وڵاته یه‌کگرتووه‌کانی ئه‌مریکا نیگه‌رانی ده‌ربڕیوه سه‌باره‌ت به پـێشـڕه‌وی له‌شـکری و سـیاسی تالیبان.
ده‌سه‌ڵاتداران ده‌ڵێن ڕێـکه‌وتنی ئاشـتی نێوان حکومه‌تی پاکسـتانی و میلیشـیای تالیباندا له هه‌رێمی مه‌لاکه‌ندی باکوری ڕۆژئاوای وڵات ڕه‌نگه تالیبانی به‌هێزکردبێت.
