کاربه‌ده‌سـتانی ئه‌مه‌ریکی ده‌ڵێن پـێشـبینی ده‌کرێت سه‌رۆک باراک ئۆباما فه‌رمان به هه‌موو جه‌نگاوره‌کانی هێزی ئه‌مه‌ریکا له عێراق بدات که تاکو مانگی هه‌شتی سـاڵی 2010 له عێراق بێنه ده‌رێ.
کۆمه‌ڵێـک له کاربه‌ده‌سـتان که ناوی خۆیان ئاشـکرا نه‌کردووه ڕۆژی سێشه‌ممه به ئاژانسه‌کانی هه‌واڵیان گوتووه له‌وانه‌یه به‌ڕێز ئۆباما پـلانێـکی کشـانه‌وه‌ی 19 مانگی له‌م هه‌فته‌یه‌دا ڕابگه‌یه‌نێت.
جێی باسه نزیکه‌ی 142 هه‌زار سه‌ربازی ئه‌مه‌ریکی له عێراق خزمه‌ت ده‌که‌ن و پـلانی کشـانه‌وه‌که‌شـیان داوا له هه‌زاره‌ها سه‌رباز ده‌کات که له ناو عێراقدا بمێـننه‌وه، تاکو مه‌شـق و ڕاهێنان به هێزه‌کانی عێراقی بکه‌ن و کارمه‌ندانی ئه‌مه‌ریکی له‌وێ بـپارێزن.
به‌پـێی ڕێـکه‌وتنێـکی هاوبه‌شـی ئاسایشی سـاڵی ڕابردووی نێوان ئه‌مه‌ریکا و عێراق ده‌بێت هه‌موو هێزه‌کانی ئه‌مه‌ریکی تا کۆتایی سـاڵی 2011 وڵاته‌که چـۆڵ بکه‌ن.
جێی باسه به‌ڕێز ئۆباما له میانه‌ی هه‌ڵـمه‌ته‌کانی هه‌ڵـبژاردندا به‌ڵـێنی دابوو به کشـانه‌وه‌ی سه‌ربازه‌کان له ماوه‌ی 16 مانگدا، به‌ڵام گوتی ئه‌و بڕیاری کۆتایی ده‌دات دوای ئه‌وه‌ی مه‌سه‌له‌که له‌گه‌ڵ کاربه‌ده‌سـتانی به‌رگریدا تاوتوێ ده‌کات.
پـلانی 19 مانگیش بژاره‌یه‌ک بوو که هه‌ردوو لایه‌نه‌کان له‌سه‌ری ڕێـکه‌وتن دوای ئه‌وه‌ی کاربه‌ده‌سـتانی باڵای له‌شـکری گوتیان بۆ کشـانه‌وه پـێویسـتیـیان به نزیکه‌ی 23 مانگ ده‌بێت و کشـانه‌وه‌یه‌کیش له ماوه‌یه‌کی زۆر کورتدا مه‌ترسی به‌رزبوونه‌وه‌ی ڕاده‌ی توندوتیژی زیاد ده‌کات.
