سەرۆکی ئەمەریکا دۆناڵد ترامپ، لە وەڵامی ڕاپۆرتێکدا سەبارەت بە ئەگەری پلاندانانی ئێران بۆ ئەنجامدانی هێرشێک بە 'بۆمبی پیس' یان چەکی کیمیایی لە واشنتنی پایتەخت، هۆشداری دا کە ئەگەر هێرشێکی لەو جۆرە ڕووبدات، ئێران باجێکی بێوێنە دەدات.
سەرۆک ترامپ ڕۆژی سێشەممە، 17ـی یازدەی 2026، لە شاری مانیلا، پایتەختی فلیپین، لە وەڵامی پرسیارێکی ڕۆژنامەواناندا وتی، "ئەگەر هێرشێکی لەو جۆرە ڕووبدات، ئێران باجێک دەدات کە تا ئێستا هیچ وڵاتێک باجێکی لەو شێوەیەی نەداوە."
سەرۆکی ئەمەریکا هەروەها وتی، "ئێمە ئەمە زۆر بە ڕژدی وەردەگرین، چونکە ئەوان شێتن."
لێدوانەکانی ترامپ دوای ئەوە هاتن کە تۆڕی سی ئین ئین دوێنێ لە ڕاپۆرتێکدا بڵاویکردەوە کە زانیارییە هەواڵگرییەکانی ئەمەریکا ئاماژە بەوە دەکەن ئێران پلانی هێرشکردنە سەر بەرپرسانی باڵای بەڕێوەبەرایەتی ترامپی هەیە لە پایتەختی ئەمەریکا، بە بەکارهێنانی بۆمبێکی تیشکدەرەوە، کە بە 'بۆمبی پیس' ناسراوە، یان چەکی کیمیایی.
لە هەمان کاتدا، ترامپ ڕایگەیاند پێی وایە حکومەتەکەی "زۆر نزیکە لە تەواوکردنی" پرسی ئێران.
سەرۆکی ئەمەریکا ئەم لێدوانانەی لە میانەی گەشتێکی فەرمی بۆ ئاسیا دا. چاوەڕوان دەکرێت لە چوارچێوەی گەشتەکەدا ڕۆژی پێنجشەممە لە شاری شێنجێنی چین، لە پەراوێزی کۆبوونەوەی لوتکەی هاوکاری ئابووری ئاسیا و زەریای هێمن (APEC)، لەگەڵ شی جینپینگ، سەرۆکی چین، و ڤلادیمیر پوتن، سەرۆکی ڕووسیا، کۆببێتەوە.
سەرۆکی ئەمەریکا هەروەها بڕیارە کۆبوونەوەیەکی دوولایەنەی جیاواز لەگەڵ سەرۆکی چین ئەنجام بدات. ترامپ لە وەڵامی پرسیارێکدا سەبارەت بە ئەگەری کۆبوونەوەیەکی تایبەت لەگەڵ پوتن گوتی، ئەگەر هەلی ئەوە هەبێت، ئامادەیە ئەو کۆبوونەوەیە ئەنجام بدات.
ترامپ ئەمڕۆ لە فلیپین، لە چوارچێوەی گرووپی 'کواد'، لەگەڵ سەرکردەکانی ئۆسترالیا، هیندستان و ژاپۆن کۆبووەوە و هەروەها دیداری لەگەڵ سەرۆکوەزیرانی تایلەند هەبوو.