دیموکراتەکان کە بڕیارە زۆرینەی کورسییەکانی ئەنجومەنی سیناتی ئەمەریکا بەدەستبهێنن، ڕووبەڕووی هەڵبژاردنی ئەوە دەبنەوە کێ پۆستی سەرکردەی زۆرینە وەربگرێت کاتێک خولی داهاتووی کۆنگرێس لە مانگی یەکدا دەستپێدەکات.
سیناتۆری ویلایەتی مێریلاند، کریس ڤان هۆڵن، ڕۆژی پێنجشەممە ڕایگەیاند کە خۆی بۆ ئەو پۆستە کاندید دەکات و ڕکابەری سیناتۆری نیویۆرک چەک شومەر دەکات کە لە ساڵی 2017ـەوە سەرکردەی پارتەکەیە لە ئەنجومەنی سیناتدا.
ڤان هۆڵن کە لە ساڵی 2016ـەوە وەک سیناتۆر هەڵبژێردراوە، ڕۆژی پێنجشەممە لە بەیاننامەیەکدا گوتی کە دەنگدەران لە هەڵبژاردنەکانی ناوەڕاستی خولی سەرۆکایەتیدا کە سێی ئەم مانگە ئەنجام درا، ''گۆڕانکارییان هەڵبژاردووە لە دۆخی ئێستا کە لە بەرژەوەندی چینی کارکەراندا نییە.''
گوتیشی، ''ئێستا لەسەر ئێمەیە وەڵامی ئەم ساتە بدەینەوە. بۆ ئەوەی ئەمە بکەین، پێویستیمان بە سەرکردایەتییەکی نوێ هەیە. ئەمە پەیوەندی بە هیچ تاکە کەسێکەوە نیە، بەڵکو پەیوەندی بە وەڵامدانەوەی بانگەوازی گەلی ئەمەریکاوە هەیە.''
لەلای خۆیەوە شومەر متمانەی خۆی دەربڕی بەوەی کە دەنگی پێویست بۆ بوون بە سەرکردەی زۆرینە بە دەست دەهێنێت و ئاماژەی بەوە دا کە پێشوازی دەکات "لە هەر گفتوگۆیەک سەبارەت بە داهاتووی فراکسیۆنەکەمان و ئەو کارە گرنگانەی کە لەپێشمانن.''
شومەر گوتیشی، ''بە پەرۆشەوە چاوەڕێی سەرکردایەتیکردنی زۆرینە نوێیەکەی دیموکراتەکان و خزمەتکردنی گەلی ئەمەریکا دەکەم.''
بڕیارە هەڵبژاردنەکە بە شێوەی دەنگدانی نهێنی لە مانگی داهاتوودا بەڕێوەبچێت. دوایین جار کە ململانێ لەسەر پۆستی سەرکردەی دیموکراتەکانی ئەنجومەنی سینات ڕوویدابێت ساڵی 1994 بوو.
پۆستی سەرکردەی زۆرینەی ئەنجومەنی سینات کۆمەڵێک دەسەڵات و ئەرکی تایبەتی هەیە، لەوانە توانای پێشکەشکردنی هەموارکردنەوە و پێشنیارەکان پێش ئەندامانی دیکە و دیاریکردنی ئەرکە سەرەکییە یاساییەکانی پارتی زۆرینە. هاوکات سەرکردەی ئێستای زۆرینە، جۆن سونی کۆماری، لە مانگی یەکی ساڵی داهاتوودا پۆستەکەی دەگۆڕێت بۆ پۆستی سەرکردەی کەمینە لە ئەنجومەنەکەدا.
ژمارەیەک لە سیناتۆرەکانی ئێستا و ئەوانەی لە مانگی یەکدا سوێندی یاسایی دەخۆن، پێشوەختە بە ئاشکرا پشتیوانی خۆیان بۆ شومەر یان ڤان هۆڵن دەربڕیوە.
سیناتۆر بێرنی ساندەرز کە سیناتۆرێکی سەربەخۆیە و لەگەڵ دیموکراتەکاندا کار دەکات، پشتگیری لە ڤان هۆڵن دەکات. ساندەرز ڕایگەیاندووە کە شومەر زیاتر لە 30 ساڵە بە سەختی بۆ پارتەکەی کاری کردووە، بەڵام ئێستا ''کاتی گۆڕانکارییە.'' هەروەها عەبدول ئەلسەیدی سیناتۆری هەڵبژێردراوی میشیگن، پشتیوانی خۆی بۆ ڤان هۆڵن دەربڕیوە.
لە بەرامبەردا سیناتۆرێکی دیکەی سەربەخۆ کە لەگەڵ دیموکراتەکاندا کاردەکات، ئەنگس کینگ لە ویلایەتی مەین، ڕایگەیاند کە پشتگیری لە شومەر دەکات. کینگ گوتی، ''چەک شومەر یەکێکە لە ئەندازیارە سەرەکییەکانی سەرکەوتووترین هەڵبژاردن لە مێژووی نوێدا، هیچ هۆکارێک نابینم بۆ گۆڕینی ئەو سەرکردایەتییەی کە یارمەتیدەر بوو لە بەدیهێنانی ئەو سەرکەوتنەدا.''
هاوکات شومەر پشتیوانی ئاشکرای هەریەک لە سیناتۆرەکانی نەڤادا، کاترین کۆرتێز ماستۆ و جاکی ڕۆزن، شیرۆد بڕاون لە ئۆهایۆ بەدەستهێناوە، کە لە دوای بردنەوەی لە هەڵبژاردنەکانی ئەم مانگەدا دەگەڕێتەوە بۆ ئەنجومەنی سینات.
دیموکراتەکان بڕیارە زۆرینەی 55 بەرامبەر 44 کورسی لە ئەنجومەنی سینات بە دەستبهێنن، لە نێوانیاندا دوو سیناتۆری سەربەخۆ هەن، لە کاتێکدا ئەنجامی کێبڕکێی یەک کورسی دیکە کە نوێنەرایەتی ویلایەتی ئالاسکا دەکات هێشتا یەکلایی نەبووەتەوە.