نوسینگەی ڕاگەیاندنی سەرۆکوەزیرانی عێراق بڵاویکردەوە ڕۆژی پێنجشەممە عەلی زەیدی پێشوازی لە تۆم باراک، نێردەی تایبەتی سەرۆکی ئەمەریکا بۆ عێراق، کرد و پێکەوە پەیوەندییە دووقۆڵییەکان و دوایین پێشهاتەکانی ناوچەکەیان تاوتوێ کرد.
بەپێی ڕاگەیەنراوێکی نووسینگەی ڕاگەیاندنی سەرۆکوەزیرانی عێراق، لە کۆبوونەوەکەدا گفتوگۆ لەبارەی ئاسۆکانی بەهێزکردنی هاوبەشیی نێوان ئەمەریکا و عێراق و فراوانکردنی هاوکارییە ئابوورییەکان و وەبەرهێنان کرا، بۆ پێشخستنی بەرژەوەندییە هاوبەشەکان و پشتگیریکردن لە گەشەپێدان.
هەروەها هەردوولا پێشهاتەکانی ناوچەکە و ئەو ئاڵەنگارییانەیان تاوتوێ کرد کە ڕووبەڕووی ئاسایش و سەقامگیریی ناوچەکە بوونەتەوە.
بەپێی ڕاگەیەنراوەکە، لە کۆبوونەوەکەدا جەخت لە گرنگیی چڕکردنەوەی هەوڵە دیپلۆماسییەکان کرایەوە بۆ کەمکردنەوەی گرژییەکان، کۆنترۆڵکردنی قەیرانەکان و ڕێگریکردن لە فراوانبوونی ململانێکان.
کۆبوونەوەکە لە کاتێکدایە هەر ئەمڕۆ سەرۆک ترامپ و سەرۆکوەزیران زەیدی پەیوەندییەکی تەلەفۆنییان ئەنجام دا.