باوبۆرانی نۆرئیستەر لە کۆتایی ئەم هەفتەیەدا لە ئۆقیانووسی ئەتلانتیکەوە بەرەو کەناراوەکانی ئەمەریکا دێت و پێشبینی دەکرێت کە ببێتە مایەی هەڵوەشانەوەی هەزاران گەشتی فڕۆکەوانی و بڕانی کارەبا لەسەر چەند ناوچەیەک.
شارەزایانی کەشناسی دەڵێن کە لەوانەیە شەپۆلی باوبۆرانەکە ببێتە هۆی بەرزبوونەوەی ئاوی ئۆقیانووس و لافاو لە چەند ناوچەیەکی ویلایەتەکانی ماساشوسێتس، ڕۆی ئایلەند، نیویۆرک، نیوجێرسی، دێلاوەر، ماریلاند، ڤێرجینیا و کارۆلاینای باکوور.
باوبۆرانەکە ڕۆژی شەممە گەییشتووەتە چەند ناوچەیەک لە ویلایەتی نیوجێرسی و لافاو دروست بووە.
شەپۆلەکە زیاتر ناو ئۆقیانووس دەگرێتەوە بەڵام ئەگەری فراوانتربوونی بۆ کەناراوەکان هەیە.
بە شێوەیەکی فەرمی ڕۆژی سێشەممە 22ی مانگی نۆ پاییز لە ئەمەریکا دەستی پێکردووە و ئەم شەپۆلەش لە ئەنجامی نزمبوونەوەی خێرای پلەکانی گەرماوە سەرچاوەی گرتووە.
باوبۆرانی نۆرئیستەر دیاردەیەکی کەشوهەوای قاڕەی باکووری ئەمەریکایە و بەگشتی لە پاییزدا دەست پێ دەکات بەڵام لە مانگی نۆدا دیاردەیەکی دەگمەنە. لەم شەپۆلانەدا هەمیشە ناوچەکانی نێوان بۆستن بۆ واشنتنی پایتەخت دەکەونە ژێر زۆرترین کاریگەری.