کۆمەڵێک لە سیناتۆری دیموکرات و کۆمارییەکانی ئەمەریکا ڕۆژی سێشەممە 28ی حەوت ڕایانگەیاند، گەیشتوونەتە ڕێککەوتنێک بۆ پێشخستنی پلانێک بۆ توندکردنەوەی سزاکانی سەر ڕووسیا و درێژکردنەوەی هەندێک سزای پەیوەست بە کەرتی وزە و چەکی ڕژێمی ئێران.
سیناتۆر جین شاهینی دیموکرات لە لیژنەی پەیوەندییەکانی دەرەوەی سینات و ڕیچارد بلومێنتێڵ، دارلین گراهام، کاتی بریت، ڕاجەر ویکەر و جیم ڕیش لەو سیناتۆرانە بوون کە ڕێککەوتنی دوولایەنەیان ڕاگەیاند.
بەپێی بەیاننامەی سیناتۆرەکان، ئامانجی سەرەکی پلانەکە لێپرسینەوەی کڕیارە سەرەکییەکانی نەوت و غازی ڕووسیایە بەهۆی یارمەتیدانی دارایی شەڕی ڕووسیا لە ئۆکرانیا. هەروەها پلانەکە ئەو سزایانە درێژ دەکاتەوە کە کەرتی وزە و چەک لە کۆماری ئیسلامی سنووردار دەکەن.
لە بەیاننامەیەکی هاوبەشدا سیناتۆرەکان ڕایانگەیاند کە ئامانجی ڕێککەوتنەکە ڕێگریکردنە لە دابینکردنی بودجەی فرۆشتنی نەوت و گازی ڕووسیا بۆ جەنگی پوتین و سنووردارکردنی زیاتری توانای کۆماری ئیسلامی بۆ پشتیوانی لە تیرۆر و پەرەپێدانی بەرنامە ئەتۆمییەکەی.
هەروەها ئەم هەنگاوەیان بە ڕێگەیەک بۆ ڕێزگرتن لە میراتی سیناتۆری کۆچکردوو لینزی گراهم ناودێرکرد.
ئەم پڕۆژە یاسایە کە بە یاسای لینزی ئۆ. گراهم بۆ سزاکانی دژ بە ڕووسیا و ئێرانی 2026 ناسراوە، سزای سەرەتایی و لاوەکی بەسەر ڕووسیا و ئەو کەس و لایەنانەی کە پشتیوانی شەڕەکەی لە ئۆکرانیا دەکەن، دەسەپێنێت.
بەرپرسانی ڕووسیا و دەوڵەمەندە دەسەڵاتدارەکانی و ئەندامانی خێزانەکانیان و کەسانی بیانی و بانک و دامەزراوە داراییەکانی ڕووسیا و کەشتییەکانی ناسراو بە "بەلەمی سێبەری ڕووسیا" لە ئامانجەکانی ئەم پڕۆژە یاسایەن.
بەپێی ئەو پڕۆژە یاسایە، سەرۆکی ئەمەریکا دەتوانێت باجی ئامانجدار بسەپێنێت بەسەر ئەو کاڵا و کەلوپەلانەی هاوردە دەکرێن لەو وڵاتانەی کە بەشێکی بەرچاو لە نەوت یان غازی ڕووسیا دەکڕن، یان یارمەتی ڕووسیا بدەن بۆ دەربازبوون لە سزاکانی وزە.
مەودای باجەکان سنووردار دەبێت بۆ پێنج گەورەترین هاوردەکاری نەوتی خاو یان غازی ڕووسیا و پێنج وڵاتی سەرەکی کە یارمەتی ڕووسیا دەدەن بۆ دەربازبوون لە سزاکانی وزە.
هەروەها پڕۆژە یاساکە بڕگەیەکی لەخۆگرتووە کە ڕێگری دەکات لە وەستانی دەسەڵاتەکانی سزاکانی ئەمەریکا بۆ سنووردارکردنی بودجە بۆ کەرتی وزە و چەکی کۆماری ئیسلامی.
بڕیارە ئێوارەی سێشەممە ئەنجومەنی پیرانی سینات دەنگ بدات بۆ دەستپێکردنی پرۆسەی پێداچوونەوە و پێشخستنی پڕۆژە یاساکە.