کۆمەڵەی شۆڕشگێری زەحمەتکێشانی کوردستانی ئێران ڕایگەیاند کە پشتیوانی لە بەیاننامەیەکی ئەم دواییەی کۆنگرەی ئازادیی ئێران سەبارەت بە شەڕە کە ناکات و ئەو بڵاوکراوەیە نوێنەرایەتی هەڵوێستی فەرمی کۆمەڵە ناکات.
کۆمەڵە لە ڕاگەیاندنەکەی ئەمڕۆ یەکشەممەدا ئاماژەی بەوەکردووە، بە پشتبەستن بە ڕێککەوتن و گفتوگۆی پێشوەختە لەناو ئەنجومەنی ناوەندی کۆنگرە، هاوپەیمانی بڕیاری داوە هەڵوێستی سیاسی تایبەت پەسەند نەکات یان دەربکات، چونکە گروپە بەشدارەکانی خاوەنی بۆچوونی سیاسی هەمەچەشنن.
کۆمەڵە دەشڵێت، مەبەست لە دامەزراندنی ئەم کۆنگرەیە وەک سەکۆیەک بۆ هاوکاری و تەبایی لە نێوان هێزەکانی دژبەری کۆماری ئیسلامی بووە نەک وەک ئۆرگانێکی دەربڕینی هەڵوێستی سیاسی یەکگرتوو.
کۆنگرەی ئازادیی ئێران لە بەیاننامەیەکیدا کە لە تۆڕی ئێکس بڵاوی کردووەتەوە شەڕ ڕەت دەکاتەوە و دەڵێت "لە ڕوانگەی ئێمەوە، نا بۆ کۆماری ئیسلامی و نا بۆ شەڕ، دوو لایەنی دانەبڕاوی خەبات بۆ ئایندەیەکی ئازاد و دێموکراتیک لە ئێرانن."
کۆنگرەکە دەشڵێت "ڕاوەستان لەدژی چەوسانەوەی ناوخۆیی ئێران بە مانای پشتیوانی لە دەستێوەردانی سەربازیی دەرەکی نییە. بە هەمان شێوە دژایەتیکردنی هێرشە دەرەکییەکان بە مانای چاوپۆشیکردن لە بەرپرسیارێتی حکومەتی ئێران لە قەیرانەکانی وڵات و پێشێلکارییە بەردەوامەکانی مافی مرۆڤ نییە."
کۆمەڵەی شۆڕشگێری زەحمەتکێشانی کوردستانی ئێران ڕایگەیاند بۆچوونەکانی سەبارەت بەو ململانێیە پێشتر لە ڕێگەی دامودەزگا فەرمییەکانی خۆیەوە بە ڕوونی خراوەتەڕوو و هەر هەڵوێستێکی سیاسی داهاتوو بە تەنیا لە لایەن ئۆرگانەکانی ڕێپێدراوی حزبەکەیەوە بەردەوام دەبێت.
ئەم ڕاگەیاندنە دوای ماوەیەکی کەم لە دەرکردنی ڕوونکردنەوەیەکی هاوشێوەی حزبی دێموکراتی کوردستانی ئێران سەبارەت بە هەمان بەیاننامە بوو. حزبی دێموکرات دەڵێت بەشدارییان نە لە داڕشتن و نە لە پەسەندکردنی بەیاننامەکەی کۆنگرە نەکردووە، چونکە ئەندامی دەستەی جێبەجێکاری کۆنگرەکە نین.